Uvaerachtige Historie ende beschrijuinge eens Landts in America gheleghen, wiens inwoonders Wilt, Naect, seer godtloos, ende wreede Menscheneeters zijn

Wat des mans cieraet is, ende hoe sy haer schilderen, ende wat haerlieder namen syn.
Dat xvi. Capittel.

SY maken een cruyne op haer hooft, ende laten daer rontom een cransken wassen van hayr gelijck eenen monninck, Ick heb haer dickwils gevraecht van waer dat sy dat monster van hayre hadden. So seyden sy, haer voorvader hadden aen eenen man gesien die hadde Meyro Humane geheten, ende hadde veel wonderlijcke dingen onder haer gedaen, ende men wil seggen dat een Propheet oft Apostel geweest is. Voorts vraechde ic haer waer sy die hayren af hadden conne snijden eer haer die schepen scheren gebracht hadden. Sy seyden sy hadden eenen steenen beytel ghenomen, ende hadden een ander dinck daer onder ghehouden, ende daer op die hayren af gheslaghen, maer die middelste cruyne hadden sy met een schelfer van eenen harden steen gemaeckt, dwelc sy dicwils gebruycken ende besigen inde stede van eender scheeren.

Voort hebben sy een dinck van roden vederen ghemaeckt ende dat heet Kannitare, dat binden sy om dat hooft, Sy hebben oock inden ondersten lippen des monts een groot gat, dat maken sy van ioncx af als sy noch ionc syn, sy steken metten scherpen punct van eenen herts horen daer door, daer in steecken sy dan een steentken oft houtken, ende

[fol. I8r]

smerent dan met haren saluen. Dat gaetken blijft dan open, Als sy nv soo groot worden dat si weyrachtich sijn, soo maken sijt dan haerlieder grooter ende dan steect hy daer eenen grooten groenen steen in, die is aldus ghemaect het smal eynde bouen, dat coempt binnen inden lippen te hanghen, ende dat dicke hangt buyten wte, ende die lippen des monts hangt haer altijt om leege vanden gewichte des steene. Oock hebben sy op beyde sijden des monts in de caken noch eenen Reynen steen. Sommighe hebbender van cristal steenen die sin smal ende lanc. Ende noch hebben si een ciraet dat sy wt groote zeeslacken huysen maken, ende die heeten sy Matte pue, ende dat is ghemaeckt als een half mane, dat hanghen sy aenden hals, het is sneewit, ende wort Bogessy ghenaempt. Ooc maken si witte cordellen van witte cordellen van witte zeesteenen ende cost veel arbeyts te maken, dat hanghen si aen den hals Oock binden sy pluymbosschen aen die armen schilderen haer swert ooc met rooden ende witten vederen so bont door malcanderen, ende die vederen placken sy opt lijf met materie die wt den boomen coempt, ende dat strijcken sy op de plaetsen daer sy pluymen hebben willen, ende daer op legghen sy dan die pluymen, ende dat blijft dan daer aen cleuen.

Ende sy schilderen hem oock den eenen arm swert den anderen roodt, die beenen ende dat Lijf des ghelijck. Sy hebben oock eenen zieraet van struysvederen ghemaeckt dat is een groot ront dick van vederen dat binden sy opt gat als sy inden crijch varen teghen haer vyanden oft sy sus eenighe feest houden, dat heet Enduap hare namen noemen sy nae die wilde dieren ende

[fol. I8v]

sy geuen haer seluen veel namen maer altijt metten onderscheyt, als sy eerst geboren worden soo wort haer eenen naem gegeuen, dien behouden sy niet langher dan tot sy weerachtich worden, ende die vyanden doot slaen, soo veel als hyer dan gedoot heeft, soo menigen namen heeft hy.