Uvaerachtige Historie ende beschrijuinge eens Landts in America gheleghen, wiens inwoonders Wilt, Naect, seer godtloos, ende wreede Menscheneeters zijn

Hoe sy haren dranck maken daer sy haer droncken in drincken, ende hoe sy haer houden metten drincken.
Dat XV. Capittel.

[fol. I7r]

DAt vrouwen volc maect den dranck Sy nemen die wortel Mandioka ende syeden groote potten vol. Alst ghesoden is nemen syt wten pot oft teyle, ende gietent in eenen anderen pot, latent een luttel coudt worden, ende dan setten haer die ionghe maechden daer by ende knauwent metten monde, ende dat gheknaude doen si in eenen besonderen pot oft teyle. Als die ghesoden wortelen al gheknawt sijn, soo doen sy dat gheknaude wederom inden pot doen, ende ghieten dien dan wederom vol waters menghelende dat metten geknauden wortelen, ende dan laten sijt wederom werm worden. Dan hebben sy sonderlinghe vaten de welcke sy half inder eerden begrauen, ende ghebruyckense daer toe ghelijckmen hier die vaten tot wijn oft bier ghebruyckt, daer ghieten sijt dan in ende makent wel toe, dat hert oft dijdt dan in hem seluen ende wort sterck, ende latent alsoo twee dagen staen ende daer na drincken sijt, ende worden daer droncken af het is dick, ende voet oock seer wel Elck hutte maeckt sijnen dranck by sonder. Ende als hem een dorp wil vrolijc maken dwelc ghemeynlijck alle maent eens ghebuert so ghaen sy eerst alle met malcanderen in een hutte ende drincken daer eerst wt, dat gaet alsoo op de rije om tot dat sy den dranck in allen hutten wt ghedroncken hebben Sy setten haer rontom dye vaten henen. Sommighe op de branden sommighe op der aerden. Die wijfs reycken den dranck veruolghende sommighe staen singhen ende dansen om die vaten henen, ende opter plaetsen daer sy drincken maken sy oock haer water, Dat drincken duert den heelen nachten, ende danssen oock

[fol. I7v]

wel tusschen die branden henen roepen ende blasen met basuynen, maken een vreesselijck gerucht als sy droncken worden. Oock sietmen luttel of selden dat sy twistich worden. Sy syn ooc malcanderen seer gonstich, ende wat die een meer heeft van eeten spijse dan de andere, dat deylt hy hem mede.