Uvaerachtige Historie ende beschrijuinge eens Landts in America gheleghen, wiens inwoonders Wilt, Naect, seer godtloos, ende wreede Menscheneeters zijn

Hoe dat sy haer spyse ghereet maken:
Dat .XII. Capittel

DAer sijn veel gheslachten des volcx die gheen sout en eten. Die ghene daer ick onder gheuanghen was sommighe van die eten sout, dwelc sy vanden Franchoysen ghesien hebben die met haer handelen, Maer sy berechten my hoe datter een natie van volck daer aent lant ligghen die raraya heeten te lantwaerts in, vander zee af dye daer sout maken van palmen boomen, ende dat si dat eten maer dies veel gebruycken teten en leefden niet langhe, ende sy makent op die maniere, want ick sacht ende halp daer toe, Sy houwen eenen dicken palmboom af, ende clieven hem in cleyne splinteren, maken daer nae een ghestelte van drooghen hout, legghen die splinteren daer op ende verbrandense metten droogen houte tot asschen, ende vanden asschen maken sy looghe ende die sieden sy dat scheyt hem dan ghelijck sout. Ick meynde het waer salpeeter geweest ende proefde dat daerom int vier, maer het en was gheen, het smaeckt oock ghelijck sout, ende is grau van verwen, maer het meeste deel van dat volc en eet gheen sout. Als sy yet sieden het si visch oft vleesch, so doen sy ghemeynlijck groenen peper daer in,

[fol. I6r]

ende alst dan redelijck ghenoech ghesoden is, soo nement syt wten sope, ende maken daer eenen dunnen bry af, dien heeten sy Mingau, ende drincken dien wt couworden, de welcke sy voor vaten hebben oock als sy eenderley spijse maken willen het sy vleesch oft visch dat eenen tijt lanck duere, dat legghen sy vier spannen hooge ouer tvier op cleyne houterkens, ende maken dan een redelijck vier daer onder ende latent so braden ende beroocken tot dat heel drooge wort. Ende als sijt daer nae eeten willen, so sieden syt weder op ende etent, ende sulcken vleesch heeten sy Mochaein.