Uvaerachtige Historie ende beschrijuinge eens Landts in America gheleghen, wiens inwoonders Wilt, Naect, seer godtloos, ende wreede Menscheneeters zijn

✠ Hoe dat haer broot is, hoe sy haer vruchten heeten, ende hoe dat sy de planten, ende maken datmense genieten can.
Dat XI. Capittel.

DIe plaetsen daer sy planten willen, houwen sy die bomen af, op die planten, ende latense een maent oft drie droghe worden, daer na steken

[fol. I5r]

sy dat vier daer in ende verbrandense, dan planten sy haer wortelen tusschen die stocken oft stroncken van welcken sy haer behulp hebben, of heten mandioka, het is een boomken eenen vadem hoge, ende geeft drie wortelen van hem, ende als sy die wortelen genieten willen, trecken sy dat boomken wt ende breecken die wortelen af, ende breken die tacken vanden bomen, ende stellense weder in die aerde, dat crijcht dan wortelen, ende in ses maenden wordet so groot dat men sijnder genieten can, sy nutten dese wortelen op driederley manieren, Ten eersten wrijuen sy die op eenen steen heel in cleyne mortzelen, dan perssen sy daer sap wt met een sifte, ende backen dan vanden mele dunne koecken. Dat dinck daer sy haer meel in drogen ende backen is van leem oft cley ghebacken, ende veel makent op een maniere van een grote schotel. Oock nemen sy die wortelen versch, ende legghense int water, ende latense daer in verrotten, ende nemense dan weder wt ende leggense onder den viere inden roock ende latense drooghen, die drooghe wortelen heeten sy dan Keyncima, ende dueren lange. Ende als syse dan nutten of besighen willen, stoten syse in eenen mortier van hout gemaeckt, soo wordet so wit als wit meel, daer maken sy koecken af die sy hieten By yvu, Oock nemen sy wel verrotten Mandioka, eer sy hem drooghen, ende mengelen die met drooghen ende met groenen.

Daer drogen sy dat meel wt, ende dat duert wel een Iaer, ende blijft euen goet om te eeten, ende sy noemen dat V, y than. Oock maken sy van visch ende vleesch meel, ende doen dat vleesch oft visch braden, ouer tvier inden rooc, ende latent heel dorre worden, ende treckent van, een ende drooghent noch

[fol. I5v]

eens in schotelen oft vaten die si daer toe metten viere ghebrant ende gemaect hebben, ende heeten ynepaun. Daer na stooten sijt cleyn in eenen houten mortier, siften door een seue, ende maken meel daer af, ende dat duert langhen tijt, wandt sy en hebben gheen gewoonte visch ende vleesch te souten sulcken meel eten sy dan totten wortel meel, ende het smaeckt tamelijck wel.