Uvaerachtige Historie ende beschrijuinge eens Landts in America gheleghen, wiens inwoonders Wilt, Naect, seer godtloos, ende wreede Menscheneeters zijn

[fol. I4r]

Waer mede sy houwen oft snijden ende sonderlinghe op die eynden, daer die Christenen haer noch gheen ware en brenghen, als bilen messen scheren ende aecxen.
Dat .X. Capittel.

SY hebben voormaels eerder schepen int lant quamen, ende noch op veel plaetsen des lants daer geen schepen en comen namelijck eenderhande swerte steenen blauwachtich ende makent ghelijck eenen beytel, ende op die breedtste sijde wetten sijt rondt, ende makent scherp het is wel een spanne lanck twee vingeren dick, een hant breet, sommige grooter sommighe cleynder dan nemen sy een dun stocxken ende buygen dat daer bouen om den beytel, ende bindent met basten te samen, Die selue figure hebben nv oock die ysere beytels die haer die Christenen gheuen op sommighe plaetsen, maer sy maken die stelen op een ander maniere, wandt sy steken daer een

[fol. I4v]

gat dore, daer steken sy den beytel dore, ende dat is haer byle daer sy mede houwen.

Sy nemen wilde verckens tanden ende wettense int midden datse scherp worden, ende bindense dan tusschen twee houterkens, daer mede schauen sy dan haer pijlen ende bogen datse so ront worden ofse gedraeyt werden, ende gebruycken oock eenen tant van een dier Pacca genoempt, ende dien wetten sy voor scherp, ende als sy ghebreken aen tlijf hebben van bloets wegen so schrabben sy op die stede daert haer seer doet dat bloedet dan, ende dat is met haer soo veel als met bussen te laten.