Uvaerachtige Historie ende beschrijuinge eens Landts in America gheleghen, wiens inwoonders Wilt, Naect, seer godtloos, ende wreede Menscheneeters zijn

Hoe die wilde Tuppin Imba diens gheuanghen ick was haer wooninghe hebben.
Dat IIII. Capittel.

SY hebben haer wooninghe voor den voorghenoemden ghrooten gheberchte vast aen der zee, oock achter dat gheberchte strect haer lieder wooninghe wel lx. mijlen, ende daer coemt een vlietende water wten berghen inder zee vlieten dat selue bewoonen sy op een sijde, ende heet die paraibe, lancx den zeestroom henen hebben sy ontrent xxviij. mijlen lants dat sy bewoonen Sy sijn alomme met vyanden bedronghen Op die Noordsijde palen sy haer met een gheslacht wilden die weittaka heeten, ende sijn haer vyanden Op die zuydtsijde sijn haer vyanden die de Tuppin Ikins ghenaempt worden. Te landewaers in sijn haer vyanden Karapa genaemt, Maer die waigamna die int geberchte vast by haer sijn, ende noch een ander gheslacht die Makapa heeten, ende tusschen haer woonen, van dese hebben sy seer groot veruolg. Die voorgenoemde geslachten hebben crijch door malcanderen henen ende als deen den anderen vangt, die eten si. Sy setten haer woninghe gaerne daer sy dwater ende hout oft bosch niet verren en hebben, om wilt ende visschen te crijgen, ende als sijt op een plaetse verwoont hebben veranderen

[fol. I2r]

sy haer wooninge op een ander plaetse, Ende als si dan willen haer hutten maken, versaemt een ouerste onder haer een partye oft .xl. mans ende vrouwen alle die hy gecrijgen can ende dat sijn ghemeijnlijck vrienden ende magen onder malcanderen, Die selue rechten met malcanderen een hutte op, die welcke is ontrent .xiiij. voet breet. ende wel .xv. voet lanck, daer na dat haerder veel sijn ontrent twee vademen hooge, bouen ront gelijc eenen kelder gewelfsel, dat selue decken sy dicht met palmen rieten datter niet in en reghene, die hutte is binnen al open, daer en heeft niemant geen gemack op sijn seluen toe ghemaeckt, een yegelijcke partye wijf ende man heeft sijn ruymte inder hutten op een sijde van xij. voeten, op die ander sijde desghelijcx een ander partye, also sijn haer hutten vol, ende een yegelijcke partije heeft sijn eygen vier. Die ouerste heeft sijn logement inder middelt vander hutten, ende sij hebben ooc alle ghemeynlijck drie poortkens oft doren, te weeten, op elck eynde een ende int midden eene, sy sijn oock soo leeghe dat sy lieden moeten bucken als sy wt ende in gaen haer dorpen hebben luttel ouer de seuen hutten, ende laten een plaetse tusschen die hutten daer sy haer geuangenen doot slaen. Ooc sijn sy genycht tot stercten rontdom haer hutten te maken die welcke ghemaect worden in sulcker manieren ghelijck hier na volcht.