Uvaerachtige Historie ende beschrijuinge eens Landts in America gheleghen, wiens inwoonders Wilt, Naect, seer godtloos, ende wreede Menscheneeters zijn

Van een gheberchte dwelck daer int lant leyt.
Dat .III. Capittel.

HEt heeft een gheberchte dwelck reickt op dry mijlen nae by der zee, maer op sommighe plaetsen voorder, ende op sommighe plaetsen naerder, ende beghint ontrent in der hoochden Boiga de todis los sanccos, een plaetse alsoo gheheten daer die Portughaloisers ghebout hebben ende woonen, Ende dat selue geberhte streckt hem inder lengde aen de zee 204. mijlen ende inde hoochde .xxix. gradus op der Suydt syden der linien equinoctiael. Desen berch eyndet hem op plaetsen, ende is acht mylen breedt Achter den berch ist plat lant ende daer comen veel schoone rieuieren tusschen die berghen wt, ende heeft veel wilts, Ende inden bergen onthouden daer een gheslacht wilder lieden die waiganna heeten, die selue en hebben gheen vaste wooninghen ghelijck die andere die voor ende achter die berghen woonen. De selue Wayganna hebben oorlooghe tegen alle die andere natien, ende waer sy die crijghen, die eten sy desghelijck also doen de andere

[fol. I1r]

haerlieden oock, Sy trecken het wilt na int geberchte, ende syn cloeck om wilt te schieten metten hantboge, ende gebruicken veel behendicheden met andere dingen, als sleypnetten, ende vallen daer sy dat wilt mede vangen. Daer is oock veel wilden honichs int geberchte, den welcken sy eeten, Sy connen oock gemeenlic ghelijc het gedierte bleten, ende gelijc de voegelen singhen, op dat syse te beter verschalken konnen, Sy ontsteken haer vier van twe houterkens, ghelijck die ander wilden oock doen, Ende dat vleesch dat sy gemeenlick eten braden sy, Sy vertrecken met wijf ende kinderen als sy haer ergens achter legeren. Seer na by haren vyanden landt vlechten sy thuynen, vast om haer hutten henen, op datmense niet haestelijcken en soude connen ouer lopen, ende om der Tygher dieren wil, steken oock scherpe doornen rontom de huten Maria cide Iu genaempt, gelijck somen hier minckijsers leyt, ende dat doense wt vrese van haren vyanden. Den helen nacht hebben sy vier by haer, ende als den dach aen coemt, so doen syt wt, op datmen den rooc niet en wort siende, ende haer na spuere. Sy laten lanck hayr opt hooft, ende lange nagelen aen de vingeren wassen. Sy hebben oock ratelen Maraka genaemt, gelijc die ander wilde, de welcke sy voor Godt houden, hebben oock haren dranck ende dansen. Oock wilde dieren tanden, daer sy mede snijden, ende steenen Beytels daer sy mede houwen, ghelijck die ander natien oock gehadt hebben, eer sy metten schepen ghecomenschapt hebben. Sy trecken oock dicwils wt na haren vyanden. Als sy die vangen willen, leggen sy haer achter dorre houteren, die by haerder vyanden hutten staen, ende doen dat daerom of daer

[fol. I1v]

eenighe wt quamen van haren vyanden om hout te halen, dat sijse dan vanghen souden Sy gaen oock veel tyrannelicken met haren vyanden om dan haer vyanden met haer doen want sy snijden haer dickwils armen ende beenen al leuendich af van grooten nijt, maer die andere slaen haer vyanden eerst doot eer sijse snijden om te eeten.