Uvaerachtige Historie ende beschrijuinge eens Landts in America gheleghen, wiens inwoonders Wilt, Naect, seer godtloos, ende wreede Menscheneeters zijn

Hoe dat lant America oft Brasilien gheleghen is, so ick eensdeels ghesien hebbe
Dat II. Capittel

AMerica is een groot landt, ende heeft veel gheslachten van wilde lieden, die selue hebben veel verandringe van spraken ende daer sij veel seltsame dieren Het is lustich om aen te sien, Die boomen sijn altijt groen, maer het en heeft geen bosch oft hout dat den boomen, bosscen oft houte van desen lande ghelijc is. Die lieden ghaen naect want het en is in dat deel des lants dat tusschen die Tropteis leyt in geenen tijt des iaers soo coudt als hier ontrent Michaelis oft bamis Maer dat deel des lants dat hem Suydt waerts vanden Tropicus Capricorni streckt, is wat couder ende daer wonen een natie van wilden die Carios heeten, die selue ghebruycken huyden van wilde dieren, die welcke sy eerst fijn bereyden ende haer daer mede bedecken. Der selver wilden wijfs maken dinghen van cattoen oft boomwollen gharen ghelijck eenen sack, onder ende bouen open dat trecken sy aen ende heeten op haer sprake Typpoy. Daer sijn int lant sommige vruchten der aerden ende boomen daer haer die menschen ende dieren mede gheneren.

[fol. H8v]

Die lieden van dien lande sijn root ende bruyn van verwen, om der sonnen wil diese alsoo seere verbrant, een gherasch volck ende wel gemaeckt van leden, listich tot alle boosheyt seer gheneycht om haer vyanden te veruolgen ende te eten etc.

Haer lantschap America heeft sommige hondert mijlen noorden ende suyden inde lenghe, van welken ic wel vijfhondert mijlen lancx dat lantschap henen ghezeylt hebbe ende een deel in veel plaetsen des lants gheweest ben.