Uvaerachtige Historie ende beschrijuinge eens Landts in America gheleghen, wiens inwoonders Wilt, Naect, seer godtloos, ende wreede Menscheneeters zijn

¶ Hoe die ouerste des scheeps genaemt waren, ende van waer dat het schip was, ende watter noch geschiede eer wi wter hauenen voeren ende hoe lange dat wi opter reisen na Vrancrijc waren
Dat .LII. Capittel.

DIe hooptman des schips was genaemt Wilhem de Moner, ende die stierman Franchoys de Schantz, dat schip was ghenaemt Catharine van wattauille, etc. Sy rusten dat schip toe om weder na vrancrijck te zeylen, so ghebuerdet op eenen morghen doen wy noch inde hauene Rio de Ieuero ghenaemt laghen dat een Portugaloisers schipken quam ende woude wter hauenen varen ende hadde ghecomenschapt met een gheslacht wilden die welcke sy te vriende hebben, ende heeten los Markayos, diens

[fol. H4r]

lantschap stoot aen die Tuppin Imba, welcke de Franchoysen te vriende hebben, die beide naty syn vyanden met malcanderen ende het was dat schipken so voor verhaelt is dat na mi comen was om mi vanden wilden af te coopen, ende hoorde een Factoor toe Peeter Rosel ghenaemt. Die Franchoysen staken haren boot wt wel versien met geschut voeren teghen haer in, ende meyndense te nemen ende namen mi mede om dat ic met haer spreken soude datse haer opgeuen souden, maer als wy dat schip aen vielen sloegen sy ons wederom af, ende alsoo werden sommighe Franchoysen geschoten, ende sommige gewont. Ic wert ooc totter doot toe gewont met eenen schuet veel meer dan yemant vanden genen die daer leuendich bleuen waren, ende ick riep in desen ancxt totten Heere, want ic en voelde anders niet dan des doots noot, ende badt onsen goedertieren God ende vader dat hy mi toch noch behoeden woude, op dat ick inder Christen lantschap wederom comen mochte ende dat ic daer

[fol. H4v]

syne aen my vertoonde weldaet, ander lieden ooc vertellen mochte ter wijlen hy my toch wt der tyrannen ghewelt verlost hadde, ende ick bequam noch wederom in volcomen gesontheyt, ghelooft sy den goedertieren Godt van eeuwicheyt tot eewicheyt. Anno M.D. ende LIIII. den lesten October gingen wy inde hauene van Rio de Ienero te seyle, ende voeren weder na vrancrijck, wy hadden ouer zee so goeden wint, dat haer die schiplieden verwonderden, ende meynden dat een alsulcke weder een sonderlinge gaue van God moest syn, ge-

lijckt oock wel te gelouen is. Oock dede de Heere een merckelijck wonder teecken by ons op der Zee, want op den seluen dach voor den Kersdach quamen veel visschen rontom dat schip, die welckemen zee verckenen heet, ende dier vingen wy soo veel, dat wijer sommige dagen genoech hadden. Des seluen gelijcken oock op den heylighen drie Coningen auont beschict ons Godt oock visschen ghenoech, want wy anders op die reyse niet veel

[fol. H5r]

teten en hadden dan wat ons Godt wter zee gaf.

Daer na op den xv. dach Februarij oft daer omtrent, quamen wy int Coninckrijck van Vrancrijck in den Iare M.D. ende LV. by een stedeken Honflor ghenaempt, ende leyt in Normandien, wy en sagen op die gantse reyse int weder comen geen lant by cans in vier maenden. Als wy nv te lande comen waren, ende sy dat schip ontladen wouden doen halp ick haer lieden oock, als dat nu oock gedaen was, doen dancte ic haerlieden van haer weldaet die sy my bewesen hadden.

Daer na begeerde ic een paspoorte vanden hooftman, maer hy hadde lieuer ghesien dat ick noch een reyse met hem aenghenomen oft gedaen hadde. Maer euen wel, doen hy sach dat ick gheenen lust te blijuen en hadde oft mede reysen en woude so bestelde hy my een paspoorte van Moensoral Mirant, een ouerste in Normandien. Die selue oock als hy van my ghehoort hadde, dede hy my voor hem comen ende gaf my selue die paspoorte, ende mijn hooftman gaf mi teergelt om ouer wech te comen. Also nam ick doen oorlof, ende vertrock van Honfloer na Habelnuef, ende van Habelnuef track ick na Diepen.