Uvaerachtige Historie ende beschrijuinge eens Landts in America gheleghen, wiens inwoonders Wilt, Naect, seer godtloos, ende wreede Menscheneeters zijn

Hoe dat corts nae dat ick verschoncken was een ander schip wt Francrijc quam die my cochten, Etc.
Dat LI. Capittel

ICk was ontrent .xiiij. dagen int dorp tarcwara sutibi, by den coninck Abbati Bossanghe, so ghebuerder op eenen dach dat sommighe wilden by my quamen, ende seyden sy hoorden schieten, dat moeste in Iteroenne sijn welcke hauene oock geheeten wort Rio de Ieuero, als ick nv sekerlijck wiste datter een schip was seyde ick haer dat sy my daer brochten want het mogen mijn broeders sijn, sy seyden Iae, maer hielden mi noch op sommighe daghen, In middelen tijde soo ghebuerdet dat die Franchoysen die daer in comen waren hoorden dat ick daer onder die wilde was, doen schickts die Capiteyn twee ghesellen vanden schepe, maer sommighe, wilde de coninghen, die welcke sy te vrienden hadden in der vlecken daer ic in was ende quamen in een hutte waer af die coninc Sowarasu hiet vast byder hutten daer ic in was mi wert die tijdinge bracht vanden wilden dat daer twee vanden schepe comen waren ic wert blide ginc tot haer, ende hietse willecome in der wilden sprake, als si mi so ellendich sagen gaen, hadden si medeliden met mi, ende deilden mi van haer clederen mede.

[fol. H2v]

Ick vraechde haer waerom sy comen waren, Sy seyden om mijnent wille, haer was beuolen dat sy my te schepe brachten, Doen verblijde ick my van herten ouer die barmherticheyt Gods, ende ic seyde tot een vanden tween Peror genaempt die welcke der wilder sprake coste, hy soude te verstaen geuen dat hy myn broeder ware, ende hadde my sommige kisten vol comenschap gebracht dat sy my met haer te schepe brachten, ende die kisten haelden, ende dat hy te verstaen geuen soude dat ick onder haer blijuen soude om peper ende meer andere ware te vergaderen tot dat die Schepen weder quamen op dat ander Iaer. Na dien woorden brachten sy my met haer te schepe, ende mijn Heere tooch seluer mede, Sy hadden int schip alle medelijden met my, ende deden my veel goets, Als wy daer ontrent eenen dach of vijue geweest hadden int schip, vraechde my der wilde Coninc Abbati Bossanghe, den welcken ick geschenct was, waer die kisten waren, dat icse my liet geuen, opdat wij weder in tijts thuys comen mochten. De selue ineyninge seyde ick den ouersten des scheeps ende die beual my ick soudese op houden, tot dattet schip synen vollen last hadde, op dat sy haer niet gram en maecten, oft onghemack onder stonden, aen te nemen, ende eenighe verraderye anrichten mochten, als sy sagen dat sy my int schip behouden wouden, om dat een volck is daer geen betrouwen op en is, maer mijn heer die Coninck meynde gantschelijck hy woude my mede thuys waert hebben, maer ick hielt hem so lange op met woorden, ende seyde hem dat hy niet soo seer en haeste want hy wiste wel als goede vrienden te samen comen, en costen so niet ghescheyden, maer als sy

[fol. H3r]

metten schepe wech wouden, dan souden wy ooc wederom na synder hutten varen, ende hielt hem also op, Ten lesten als dat schip toegherust was, versaemden die francoysen alle by malcanderen, ende ick stont by haer, ende mijn heer die Coninc met die hy by hem hadde, stonden oock daer. Ende die hooftman des scheeps liet den wilden seggen met synen taelspreecker, dat hem wel behaechde dat sy my niet ghedoot en hadden, na dien sy my onder hare vyanden gheuonden hadden, liet hem voort seggen (om my met beter gheuoechlicheydt van haer te brengen) dat hy haer wat geuen woude om dat sy my so wel bewaert hadden, daerom hadde hy my met hem int schip begheert, om dat hy my sommige waren doen soude, ende dat ic onder haer blijuen soude, terwijlen ick by haer bekent was, om peper ende ander goet te vergaderen, dat hem dienende was, tot dat hy weder quame, So hadden wyt nu so gesloten, dat een oft x. vanden schiplieden versaemden, die welcke my in eeniger manieren gelijck ende gonstich waren, deselue gauen wt dat sy mijn broeders waren, ende wouden my mede thuys hebben, Dese meininge wert den wilden voor gehouden, dat mijn broeders in geender manieren en wouden hebben dat ick weder aent lant soude gaen, maer ick moeste thuys trecken want ons vader begheerde my noch eens te sien eer hy storue. Doen liet hem die Capiteyn oock weder segghen, hy was die ouerste int schip ende hadde geerne dat ick wederom aent lant ginck maer hy en was maer een mensche, ende mijne broeders waren veel, ende en cost niet tegen haer gedoen, Dat wt geuen gebuerde also, om dat sy met properheyt vanden wilden geraken souden, ende ick

[fol. H3v]

seyde oock tot mijn Heer de Coninck. Ick woude geerne weder met hem te huys trecken, maer hy sach wel mijn broeders die en woudens niet toelaten. Doen begost hy te weenen int schip, ende seyde, als sy my wouden mede nemen, dat ic dan met een eersten schepe weder quame, want hy hadde my voor sinen sone ghehouden, ende was seer toornich op die van v wattibi dat sy my hadden willen eten. Ende eene van sijnen vrouwen die welcke ooc mede int schip was, moesten my beschreyen nae haer ghewoonte, ende creet oock op haer maniere. Daer na gaf haer de hooftman sommige ware, weert sijnde ontrent vijf ducaten, in messen, aecxen, spieghelen ende cammen, Daer mede togen sy weder aent lant na haer wooninghe. Also halp my die almoghende God wt der tyrannen ghewelt, hem sy prijs ende eere, door Iesum Christum sijnen sone onsen salichmaker. Amen.