Uvaerachtige Historie ende beschrijuinge eens Landts in America gheleghen, wiens inwoonders Wilt, Naect, seer godtloos, ende wreede Menscheneeters zijn

¶ Hoe si mi voerden om te verschenken
Dat XLIX. Capittel.

SY voeren met mi daer henen daer sy my verschencken wouden Tackwara sutibi genaempt ende als wy een stuck weechs vanden lande waren, sach ick om na die hutten daer ick wt voer ende daer was een swerte wolcke ouer die hutten. Ick wees haer dat ende seyde mijn God was toornich ouer dat dorp dat Christen vleesch gheten hadden, Etc.

[fol. H1v]

Ende als sy my haer brachten, leuerden sy my in den handen vanden eenen coninck Abbati Bossanghe ghenaempt, den seluen seyden sy dat hy my ghenen ouerlast doen oft laten doen en soude, want mijn God was vreesselijck en ouer die my leet deden, want dat hadden si gesien doen ick noch by haerderlieden was, ende ic dede hem seluuen ooc een vermaninge ende seyde, mijn broeders ende mijn vrienden souden corts comen met een schip vol waren, dat sy my slechs wel bewaerden ick woude haer dan veel waren gheuen, want ic voor waer wiste mijn God soude mijns broeders schip corts aenbrengen, Dat behaechde haer wel, ende de Coninck hiet my sone, ende ick ghinc oock met sijnen sonen op het weydewerck.