Uvaerachtige Historie ende beschrijuinge eens Landts in America gheleghen, wiens inwoonders Wilt, Naect, seer godtloos, ende wreede Menscheneeters zijn

Hoe sy den anderen vanden twee geghebraden Christenen aten, Ieronimus ghenaempt.
Dat xlviij. Capittel.

ALs nu die wilde Parwa alle gereetschap by malcanderen hadde, als gheseyt is, liet hy

[fol. H1r]

dranc maken om des Ieronymi vleesch te bedrincken. Als sijt bedroncken hadden, brochten sy die twee ghebroeders by my ende noch eene Antonius genaemt, den welcken mijns heeren soon gheuanghen hadde, so dat onser vier Christenen by den anderen waren, ende moesten met haer drincken maer eer wi drincken wouden, deden wy ons ghebet tot God dat hy der sielen ghenadich woude sijn, ende ons oock als onse vre quame, ende de wilde alfden met ons, ende waren vrolijck, maer wy saghen groote ellende. Des anderen daechs des morghens vroech soden sy dat vleesch wederom op, ende atent, ende haddent op een corte tijt vernielt. Den seluen dach voerden sy my te verschencken, Als ick nv van beyde die ghebroeders schiet, baden sy my dat ick God voor haer bidden soude, ende ick gaf haer raet waert dat sy ontloopen costen, waert dat sijt henen nemen souden int geberchte, op dat sijse niet en costen nae gheuolgen want ick des gheberchs kenschap hadde, dwelck sy oock ghedaen hadden, ende waren so los worden ende ontloopen, also als ic namaels vernam oft sy weder gheuangen werden, en weet ic noch niet.