Uvaerachtige Historie ende beschrijuinge eens Landts in America gheleghen, wiens inwoonders Wilt, Naect, seer godtloos, ende wreede Menscheneeters zijn

Hoe ic op eenen auont met twee wilde op die visscherie was, ende God een wonder by my verthoonde door eenen grooten regen ende onweder.
Dat XLVII. Capittel

IC stont ende vischte met noch twee van henlieden, waer af die eene ooc een vanden vernaem-

[fol. G8v]

sten was onder den wilden, ende was Parwa ghenaemt, die Ieronimum gebraden hadde, Ende als wy metten anderen stonden ende vischten, soo verhief hem eenen groten wint ende reghen met eenen donder int afscheyden vanden dage, ende reghende niet verre van ons, so dat den wint den reghen heel na by ons dreef. Doen baden wy beyde die wilde dat ick met mijnen Godt spreken woude, dat ons den regen niet en mocht hinderen, mogelijck sullen wy noch meer visschen vangen, want ick sach wel wy en hadden inder hutten niet te eeten. Die woorden beweecheden my, ende ick bad den Heere wten gront mijns harten dat hy syn macht by my woude bewijsen ter wijlen die wilde dat van my begeerden, op dat sy nu sien souden dat ghy mijn Godt altyt by my sijt.

Als ick dat gebet voleynt hadde, so roempt die wint metten reghen aen pruysen, ende het regende ontrent ses schreden van ons, ende op die plaetse daer wy waren en vernamen wy niet, soo dat die wilde Parwa seyde, Nv sie ick wel dat ghy met uwen God ghesproken hebt ende wy vingen sommige visschen. Als wy nv inder hutten waren, seyde alle beyde dese wilde den anderen wilden dat ick met mijnen God ghesproken hadde, ende sulcke dinghen ghebuert waren, daer af verwonderderden haer alle die andere.