Uvaerachtige Historie ende beschrijuinge eens Landts in America gheleghen, wiens inwoonders Wilt, Naect, seer godtloos, ende wreede Menscheneeters zijn

✠ Hoe dat die almachtige Godt een teecken dede.
Dat xlvi. Capittel.

ICk hadde een cruys gemaect van staken, by dat welcke ick dickwils mijn ghebedt dede totten Heere, ende ick hadde den wilden beuolen sy en soudent niet wt trecken

[fol. G8r]

haer mocht ongeluck daer af comen, maer sy verachten mijn woorden. Op een tijt was ick met haer op te visscheryen, ende daer en tusschen hadde een vrouwe dat cruys wt ghetrocken, ende hadt haren man gegeuen, om dat ront was die soude haer een soorte van Pater nosters wrijuen, de welcke sy van zeeslecken huyskens maken, dwelc my nv seer verdroot. Corts daer nae beghostet seer te regenen, ende duerde sommige dagen. Sy quamen in mijn hutie, begherende ick soudet met mijnen Godt maken dat den reghen mocht ophouden, want waert dat niet op en hielde, het soude haer planninge verachteren, want haren plantijt was daer, Ick seide het was haer schult, want sy hadden mijnen Godt vertorent dat sy dat hout hadden wt getogen, want by dat hout plach ick mit mijnen Godt sprake te houden, Als sy nu meynden dat dat de oorsaecke was des regens, so hielp my mijns heeren sone weder een ander cruys oprichten, ende het was doen ontrent een vre nae middagh, nae der sonnen te rekenen. Alst opgericht was, werdet terstont schoon weder, ende het was voormiddage seer ongestadich. Sy verwonderden haer alle ende meynden mijn Godt dede al wat ick woude.