Uvaerachtige Historie ende beschrijuinge eens Landts in America gheleghen, wiens inwoonders Wilt, Naect, seer godtloos, ende wreede Menscheneeters zijn

Hoe sy nv den eersten vanden twee Christenen aten, namelijck Gheorgio. Ferrero des Portugaloisers hooftmans sone.
Dat XLV. Capittel.

[fol. G7v]

SO wasser nv een Coninc ouer een hutte rechte teghen mijnder hutten ouer, die selue was genaemt Taramiri, die hadde eenen gebraden, ende liet dranck maken na haer gewoonte ende haerder veel versamelden haer daer si dronken, songen ende maecten grote vruecht. Des anderen daechs na dat drincken soden si dat ghebraden vleesch wederom op, ende atent. Maer des anderen Ieronymy vleesch, hinck inder hutten daer ick in was in eenen corf ouer dat vier inden roock wel dry weken lanc, dattet alsoo drooghe was als een hout, ende dattet so langhe ongegeten hinck ouer dat vier was dese oorsake. Die wilde diet hadde was genaemt Perwa, ende die was op een ander plaetse ghetrocken wortelen te halen om den dranck te maken om des Ieronymy vleesch daer mede te bedrincken, dat den tijt alsoo verliep, ende sy en wouden my niet eer nae dat schip voeren, sy en hadden dan eerst de feeste met Ieronimum gehouden, ende dat vleesch geten. Binnen desen middelen tijde was dat Francoys schip wederom wech gheuaren, want het mocht ontrent acht mijlen weechs van daer syn daer ick was. Als ick die tijdinge hoorde, was ick seer bedroeft maer die wilden seyden, sy plegen gemeenlick alle iaer daer henen te comen, ende also moeste ick te vreden zijn.