Uvaerachtige Historie ende beschrijuinge eens Landts in America gheleghen, wiens inwoonders Wilt, Naect, seer godtloos, ende wreede Menscheneeters zijn

Hoe dat die wilde inden crijch trocken ende mi mede namen, ende hoe dat op den tooch verghinck.
Dat XLI. Capittel.

DAer nae in vier daghen versaemden haer sommighe naeckers die totten crijch wouden trecken in dat dorp daer ic in was, daer quam die ouerste Ronyan Bebe metten sijnen oock daer by Doen seyde mijn heere, hi woude mi mede nemen, ick seyde dat hy mi thuis liet ende hadt oock wel ghedaen maer doen seyde die Ronian Bebe hy soude my mede nemen. Ick en gheliet mi niet anders dan dat ick noode met trocke, op dat sy als ick ghewillich mede ghetrocken hadde niet ghedacht en hadden dat ick haer ontloopen soude als sy by haerder vyanden lant quaemen, ende des te min acht op my hadden. Ooc was mijn meyninghe als sy my hadden thuys ghelaten, ic woude nae dat Francoys schip gheloopen sijn maer sy namen my mede, ende waren .xxxviij. naeckers sterck, ende elcken naecker beset met .xviij. mans meer oft min, ende haerder sommighe hadden gepropheteert met haren afgoden vanden crijch met droomen ende ander gheckspel meer dwelck si ghebruycken alsoo dat

[fol. G3r]

sy wel ghemoet waren totter sake. Ende haer meyninghe was in die teghenheyt Brikioka te varen daer si my vinghen, ende haer daer rondtom opt lant verstercken, ende die haer in dier maten inde handen vielen, om die met te nemen. Ende als wy den wttocht des crijchs begosten, was indt iaer .MCCCCC. ontrent den .xiij. Augusti. Soo loopen nv in dese maent so voorgheseyt is, een gheslecht van visschen, die inde Portugaloisers sprake, Doyngho heeten op Spaensch Liesses, ende inder wilde sprake Brattij wter zee inde soete wateren om daer in te ligghen ende die Wilde heeten den tijt Pirakaen, als dan trecken si van beyden gemeynlijck ten crijchwaert, haer vyanden so wel als si, om die visschen op de reyse te vangen ende te eten. Als sy daer henen varen, varen si saechte, ende als sy wederom varen si opt geringste dat si connen. Soo hoepte ic nv altijt dat die oock souden opte reyse sijn die welcke der Portugaloisers vrienden sijn want die selue waren oock inden wil desen int lant te vallen, also my die Portugaloisers te voren int schip gheseyt hadden. Sy vraechden mi doorgaens op de reysen wat my dochte, oft si ooc yemant vanghen souden ende op dat icxse niet gram en maecte, seyde ic. Ia, Oock seyde ick haer, die vyanden sullen ons verteghen so laeghen wi eenen nacht in eenen hoec lants die Vwattibi heet, daer vinghen wy veel van dien visschen Bratti, die welcke so groot sijn als eenen goeden snoeck, ende het waeyde dien nacht seer, soo gheckten sy met my, ende wouden veel vraegen soo seyde ick desen windt waeyt ouer veel dooden lieden Nv wasser eenen anderen hoop van desen ooc te water aen een riuiere tusschen dat lant heenen gheuaren ghenaemt die paraibe, Ia meynden sy hoe nae hebben

[fol. G3v]

die der vyanden landt al reede aen gheuallen, dat haerlieder sommige sijn doot bleuen. Als wy nv een dach reyse van daer si haren aenslach volbrenghen wouden, leegerden si haer int bosch by een eylant welck sanckte Sebastiaen vanden Portugaloisers genaempt wort maer die wilde hetent Meyenbioe.

Als den Auondt aen quam ghinck die Ouerste Ronyan Beve ghenaemt door den leeger heenen int wout preeckende, ende seyde sy waren nv nae by der vyanden lant comen, dat een yegelijck sijnen droom onthielde die hen die nacht droomen soude, ende dat sy toe saghen dat haer wat gelucx droomde, Als die reden wt was dansten sy tot inden nacht met haren afgoden daer nae sliepen si, ende als mijn here hem neder leide seide hi, ic soude my oock wat goets droomen laten, Ick seyde ic en achte op geen droomen sy sijn valsch, soo maect met uwen God euen wel dat wy vanghen mogen. Als den dach nv op brac versaemden haer die ouerste om een becken vol ghesoden visch, die welcke sy aten, ende vertelden die droomen so veel datse haer wel gheuielen, sommighe die dansten medt haren afgodens, ende sy hadden voorghenomen ende waren vanden wille om op dien seluen dach na by haerder vyanden lant te varen, by een plaetse Baywassukanghen genaempt ende daer wouden sy beyden tot dat den auont quam, Als wy wt voeren van die plaetse daer wi dien nacht gheleghen hadden Meynenbipe genaempt, vraechden sy my noch eens wat my dochte. Doen seyde ick, ter auontueren by Boywassukanghe sullen ons die vyanden verteghenen, sijt maer wel ghemoet, ende by dat selue, Boywasukanghe was

[fol. G4r]

mijn meynighe, woude ick haer ontloopen sijn waert dat wy daer waren comen, wandt daer sy my gheuanghen hadden, en was maer ses mijlen weechs vanden seluen hoeck. Als wy nv so voort lancx dat lant henen voeren saghen wi oock naeckers die quamen ons teghen achter een eylant henen doen riepen si, daer comen onse vyanden die Tuppin Ikints ooc aen doch wouden si haer verbergen acher eenen steen mette naeckers, opwerpende dat si onuersiens bi haer comen souden euen wel so sy onsen gewaer ende gauen haer weder ter vlucht na haren huys, ende wi roiden opt haesticste na wel vier ganssche vren lanc daer na quamen wi aen haer, ende haerder waren vijf naeckers vol, ende waren al van brikioka Ick kendese al tsamen wel ende daer waren

ses Mammelucken in een van die vijf naeckers, ende die selue waren gedoept, onder haer waren

[fol. G4v]

twe gebroeders, die een ghenaemt Diego de Praga, die ander Domingo de Praga, die selue twee deden grote weyre, die een met eenen roere, de ander met eenen flitsboge, die twe hielden op in haren naecken twee heel uren tegen meer dan dertich vanden onsen naeckers. Als sy nu haer pijlen verschoten hadden, vielen die Tuppin Imba haer aen, ende namense geuangen, ende sommige werden terstont doot geslagen ende geschoten ende beyde die broeders werden niet gewont, maer twe vanden ses Mammelucken werden seer deerlicken gewont, ende vanden Tuppin Ikins oock sommige, onder die welcke een vrouwe was.