Uvaerachtige Historie ende beschrijuinge eens Landts in America gheleghen, wiens inwoonders Wilt, Naect, seer godtloos, ende wreede Menscheneeters zijn

Hoe sy een slaue onder haer hadden die my dicwils belooch, ende hadde gaerne gesien dat sy my corts ghedoot hadden, maer die selve wert ghedoot ende gheten in mijn tegenwoordicheyt.
Dat xxxII. Capittel.

SO wasser nv een slaue onder haer die was van eender natien gheheeten Carios ende sijn oock den wilden viant ende der Portugaloisers vrienden die selue was den portugaloisers eyghen gheweest ende was haer daer nae ontloopen, Sulcke en dooden si niet die so tot haer loopen ten sy datsi wat sonderlincx misbruycken maer houdense voor haer eyghen ende moeten dienen, die selue Carios was drie iaer onder den Tupepin Imba gheweest, ende seyde hi hadde my onder die Portugaloisers ghesien, ende ick hadde dickwils onder dye Tuppin Imba gheschoten als sy derwaerts ten crijghe waren gecomen.

[fol. F8r]

Soo hadden nv die Portugaloisers voor sommige iaren van haren coningen een gheschoten welcken coninck die Carios seyde dat ick gheschoten hadde ende riet ommers daer toe men soude my dooden, want ic was die rechte vyant, hy hadt gesien, ende loecht al metten anderen wandt hi was drie iaer onder haer geweest, ende het was eerst een iaer geleden dat ic tot S. Vincente comen was, daer hi ontloopen was Ende ic badt God dicwils dat hy mi voor die logene behoeden woude. So gebuerdet ontrent den iare 1554. inde sestemaent dat ick geuanghen was, so werde die Carios sieck, ende sijn heere badt my ic soude hem helpen op dat hy weder gesont werde ende vinck wilt dat wi te eten cregen wandt ic wist wel als hy hem yet brocht daer gaf hy mi ooc af, maer waert dat mi dochte dat hi niet weder gesont worden en soude so soude hi hem een goeden vrient schencken die hem doot sloech, ende eenen naem aen hem wonne soo was hi alreede ontrent neghen oft thien daghen sieck gheweest nv hebben sy tanden die sijn van een dier dwelck si backe heeten, die selue tanden wetten si scherp, als dat haer bloet, hinder so snijden si met die tanden ouer die huyt henen, daer loop dan dat is so veel als wanneermen hier eenen coppentset. Vanden seluen tanden nam ic een meynende hem daer mede die mediaen te slaen, maer ick en costese daer mede niet door gesteken, want den tant was te bot, ende si stonden om my Als ick nv weder van hem ghinck, sach ic dat gheen profijt en was doen vraechden sy my oft hi weder ghesont soude worden. Ick seyde haer, ick en hadde niet wt gherecht, daer en was gheen bloet wt gheloopen, dat hadden si wel gesien

[fol. F8v]

Iae meynden si hi wil steruen, wi willen hem eer hi sterft doot slaen. Ic seyde neen en doet dat niet hi sal mogelijck wederom ghesont worden maer ten holp niet si toghen hen voor des coninck Vratinghe hutten ende haerder twee hielden hem ende hi was so cranc dat hi niet en wist wat si met hem doen wouden, so quam die hi gegeuen was doot te slaen, ende sloech hem opt hooft dat die herssen wt sprongen, daer lieten si hen ligghen voor die hutte, ende wouden hen eten. Ick seyde dat sijt niet en dede het was een cranck mensche gheweest, sy mochten nu oock sieck worden, ende also en wisten sy niet

wat si doen souden, doch quam daer een wter huttendaer ic in was, ende riep die wijfs dat si een vier bi den dooden maecten, ende si sneet hem dat hooft af, want hi en hadde maer een ooghe, ende scheen leelijck vander sieckten die hi ghehadt hadde, also dat hy dat hooft daerom wech werp, ende het lichaem sengde hy die huyt ouer tvier. Daer na sneet hy hem, ende deylde den anderen oock ge-

[fol. G1r]

lijck so haer ghewoonte is, ende aten hem op tot aen den cop ende op die dermen nae, daer wisten sy ghebreck aen om dat hy cranck geweest hadde. Daer ginck ic ouer en weer door de hutten, inde eene braiden sy de voeten, inde andere die handen inde derde die stucken vanden lijue. Doen seyde ick hen lieden hoe dat die Carios dien sy daer brayden ende eten wouden, hadde my altijt belogen ende seyde ic hadde sommige van uwen vrienden, ter wijlen dat ick by den Portugaloisers was geweest geschooten ende het was gheloghen want hi en hadde mi noyt ghesien nv weet ghy wel dat hi sommighe iaren onder v geweest is, ende noyt cranc gheworden nv euen wel om der loghenen wil die hy op my gheloghen heeft, is mijn God toornich gheworden ende heeft hem sieck gemaeckt, ende v hen ghegeuen dat ghy hem ghedoot hebt ende ooc eten sult, alsoo sal mijn God alle schalcken doen die mi leet ghedaen hebben ende noch doen willen. Voor sulcke woorden verscricten haerder veel des dancke ic den almachtigen God dat hi in allen dingen so geweldigen ende ghenadich tot my waerts hem verthoonde

Bidde daerom den Leser dat hy wel achtinghe hebbe op mijn schrijuen, want ic en doe dese moeyte niet in sulcker wijse als oft ick lust hadde wat nieuws te schrijuen, maer alleen om dat ick die oprechte waerheyt ende die weldaet Gods aen den dach brenghen soude.

So naecte nv den tijt dat si wouden ten crijch trecken, daer sy drie maenden op toegherust hadden om dien te voeren, soo hoepte ick altijt als sy wt-trocken sy souden my by haer vrouwen thuys laten, ende soo woude ick ter wijlen sy wt waren ontloopen sijn.