Uvaerachtige Historie ende beschrijuinge eens Landts in America gheleghen, wiens inwoonders Wilt, Naect, seer godtloos, ende wreede Menscheneeters zijn

¶ Hoe sy eenen geuanghenen aten, ende my mede daer by voerden.
Dat .xxxVI. Capittel.

VOorts nae sommighe daghen dat sy immer eenen geuangen eten wouden in een dorp Tick querippe genaemt ontrent ses mijlen van daer ick geuangen lach so trocken daer oock sommighe wter hutten daer ick in was die voerden mi mede, ende de slaue die si eten wouden, was eender natie die Markapa heet, ende voeren met eenen naecker derwaert. Als nv den tijt quam dat si hem bedrincken wouden, deden si na haer ghebruyck, want als si eenen eten willen, soo maken sy eenen dranck van wortelen die heeten sy Kawi, als die ghedroncken is, daer na dooden sy hem, Des auonts so sy des anderen daechs sijnen doot bedrincken wouden, ginck ick by hem ende seyde tot hem. Ia ghi sijt al gerust totten doot. Daer loech hy ende seide. Ia, So heeten nv de snoeren daer sy die geuangen in binden Mussuraua ende is van catoen gemaect ende is dicker dan een vingher so was hy wel gherust met alle dinghen dan alleen die Mussuraua en was noch niet lanc ghe-

[fol. F4r]

noech, daer ghebraken noch ontrent ses vademen daer aen, Ia seyde hy by haer haddense beters, ende maecte alsulcke maniere als oft hy ter kermissen souden ghaen. Soo hadde ick nv een boec by mi in Portugaloisers sprake het welck die wilden in een schip ghenomen hadden dat sy door hulpe van den Franchoysen ghewonnen ende my ghegheuen hadden Ende ick ghinck vanden gheuanghenen ende las in dat boeck ende my iammerde sijnder, Daer ghinck ick weder tot hem ende sprack tot hem want die Portughaloisers hebben die selue Markayn oock te vrienden ende seide hem Ic ben oock een gheuangen so wel als ghy, ende en ben niet hier comen om dat ick van v eten soude maer min heeren hadden my mede ghebrocht Doen seyde hy hy wist wel dat wy lieden geen menschen vleesch en eten Voort seyde ic hem hy soude getroost sijn, want sy souden hem dat vlees alleen eten, maer sijnen gheest soude op een ander plaetse varen daer onse geesten oock henen varen, daer is veel vruechden. Doen meynde hy, oft dat oock waer was Doen seyde ick ia. Ia seyde hy, hy en hadde God noyt ghesien. Ick seyde hem hy soude hem int ander leuen sien. Als ick nv mijn reden met hem gheeyndt hadde ghinck ick van hem. Dien seluen nacht als ick des daechs met hem ghesproken hadde, quam eenen grooten wint ende waeyde so vreesselijcken dat hy stucken vanden daecken vander hutten waeyde Daer begosten die wilde op my gram te worden, ende seyden in haer sprake. Apo Merien genphamy wittu wasu Immon. dat is aldus gheseyt. Der boose mensch die heylighe maeckt dat die wint nv coempt want hy sach des daechs in de donner heude ende meinden dat boec dat ic hadde ende

[fol. F4v]

dedet daerom dat die slaue mijn ende der Portugaelschen vrient was, ende ic meynde ter auonturen die feest te beletten, metten quaden wedere.

Ick badt Godt den Heere ende seyde: Heere ghy hebt my tot hier toe beschermt, behoedet my.

Als nv den dach an quam so werdet schoon weder, ende sy droncken ende waren wel te vreden.

Doen ghinck ick by den slaue, ende seyde hem in grote wint was Godt geweest, ende hadde hem willen hebben. Daer nae des anderen daechs wert hy geten, hoe dat sulcx toe gaet, sult ghy in die leste Capittelen vinden.