Uvaerachtige Historie ende beschrijuinge eens Landts in America gheleghen, wiens inwoonders Wilt, Naect, seer godtloos, ende wreede Menscheneeters zijn

✠ Hoe een schip van sancte Vincente quam, ende vraechde na my, ende hoe sy haer een cort berecht gauen.
Dat .XXXII. Capittel.

MIddelen tijt quam een schip met Portugaeloisers van Brikioka, ende anckerden niet verre van daer, daer ick geuanghen

[fol. E8r]

lach, ende schoten een stuck geschuts af op dat die wilde hooren souden ende se met haer comenschap houden souden. Als si nv des ghewaer werden, seyden si tot my daer sijn v vrienden die Portugaloisers ende willen moghelijc hooren oft ghi ooc noch leeft, ende willen v coopen. Doen seyde ick, Het sal mijn broer sijn, want ic vermoeyden dat de Portugaloisers schepen die dien hoec lants ouer varen na mi vragen mochten, ende op dat die wilde niet meynen en souden dat ick een Portugaloiser waer so seyde ick dat ick noch een broeder hadde, dat welck oock een Francoys was, onder den Portugaloisers. Als nv dat schip aen quam seide ick het sal mijn broeder sijn, sy en wouden niede anders gheloouen dan ick was een Portugaloiser, ende voeren so nae by dat schip dat sy sprake met haer costen houden. Doen hebben die Portugaloisers geuraecht hoe dat met mij ware doen hebben si geantwoort dat sy na my niet meer en vraechden, ende dat schip voer wederom henen, meynden moghelijck ic was doot als ic dat schip sach wech varen wat ick dochte weet God wel sy seyden onder malcanderen, wy hebben den rechten man. Sy seynden alreede schepen na hem.