¶ Hoe Tuppin Ikins een ander dorp Manbukabe ghenaemt, verbrant hadden
Dat XXXI. Capittel.
DEs anderen daechs daer na quam die tijdinge van eenen dorpe Mambukabe ghenaemt dat die Tuppin Ikins doen si van daer gheuaren waren daer ic geuangen lach, dat dorp Mambukabe aen gheuallen hadden ende de inwoonders waren alle ontloopen op eenen ionge na ende dien hadden si geuangen, ende hadden haer die hutten verbrant. Doen tooch Ippio wasu derwaert want sy waren van sijnen vrienden ende maechschap, ende wouden haer die hutten wederom op helpen maken. Aldus nam hy ghemeynlijc alle vrienden van sijnder hutten met hem. Dese Ieppio Wasu was doen ende laten ouer my, ende dede my veel leets aen ende was vander meyninghen om van daer leem oft cley te brengen ende oock wortelen meel om de seste reede te maken om mi te eeten, ende als hy wt toch beual hy den ghenen dien hy my gheschenct hadde Ipperu wasu genaempt, dat hy mi wel bewaren soude tot dat hi weder quame. Aldus waren sy langher dan veerthien daghen wt ende maecten daer ghereetschap.
Auteursrechtvrij