Uvaerachtige Historie ende beschrijuinge eens Landts in America gheleghen, wiens inwoonders Wilt, Naect, seer godtloos, ende wreede Menscheneeters zijn

[fol. E6r]

Hoe die xxv, Naeckens van Tuppin Ikins aen quamen, daer ick den Coninck af geseyt hadde, ende wouden die hutten aenvallen daer ick in was.
Dat XXIX. Capittel.

IN middeler tijt gebuerdet dat die xxv. naeckens van den wilden die de Portugaloysers te vriende hebben aen quamen.

Oock so ick te voren gheseyt hadde, dat eer ick gheuangen wert die selue inden wil hadden derwaerts ten crijch te varen, soo ghebuerdet op eenen morghen stont dat sy dat dorp aen vielen.

Als nu die Tuppin Ikings dese hutten wouden aenvallen, ende begost te hoop te schieten, soo wast dat desen die inde hutten leet, Want die vrouwen wouden haer die vlucht gauen, Doen

seyde ick haer, ghy hout my voor een poortegaloiser, uwen viant, geeft my nu eenen boge met pijlen, ende laet mi los gaen, so wil ic v helpen verdedigen

[fol. E6v]

Sy deden my eenen booge met pijlen, Ick riep ende schoot, ende maectet op haer wijse soo ic best cost ende sprac haer toe dat sy wel gemoet souden wesen ten hadde geen noot, ende mijn meyninghe was dat ic woude door staecket comen, dwelc rontom de hutten ginck, ende totten anderen loopen, want sy kenden my wel, ende wisten ooc wel dat ick in dat dorp was, maer sy bewaerden my al te wel. Als die Tuppin Ikins sagen dat sy niet bedrijuen en costen, ghingen sy weder in haer naeckers ende voeren voorts, als sy nv wech waren bewaerden sy my als te voren.