Uvaerachtige Historie ende beschrijuinge eens Landts in America gheleghen, wiens inwoonders Wilt, Naect, seer godtloos, ende wreede Menscheneeters zijn

✠ Hoe een Francoys die de schepen onder de wilde ghelaten hadde daer quam om mi te besien, ende haer beual datse my eten souden, ick was een portugaloiser.
Dat XXVI. Capittel.

DAer was een Francoys vier mijlen van der hutten daer ick in was, ende als hy nv die tijdinghe hoorde, quam hy derwaerts, ende ghinck in een ander hutte ouer daer ick in was, Doen quamen die wilde tot my ghelopen ende seyden hier is nv een Francoys comen, nv willen wy sien of ghy een Francois sijt oft niet Daer af verblijde ick mi, ende dacht hy is een Christen hy sal wel ten besten spreken, Doen seyden sy my by hem, ende hy was een ionc geselle. Die wilde hieten hem Karwatuware,

[fol. E3r]

ende hy sprack my Francoys toe, maer ick en cost hem niet wel verstaen, ende die wilde stonden ront om ons ende hoorden toe. Als ick hem nv niet antwoorden en cost seyde hy totten wilde op haer sprake doodt den boswicht ende eet hem, het is een rechte portugaloiser, v vyant ende mijn vyant ende dit verstont ic wel ende badt hem daerom om Gods wille dat hi haer doch segghen woude dat sy my niet eten en souden. Doe seyde hy si willen v eten. Doen dachte ick opt woordt Ieremye dat daer gheschreuen staet in sijn xvij. capittel daer hi aldus seyt Vermaledijt is die mensche die op menschen betrout. Ende metten seluen ginck ic weder van haer met grooten hertsweer, ende ick hadde op die schouderen een stuck lijnen doecx ghebonden dwelck si mi gauen, God gheue waer dat sit ghecreghen hadden dat schoorde ick af ende worp dat den Francoys voer sijn voeten, Dye sonne hadde my seer verbrant, ende ick seyde tot mi seluen soude ick dan oock steruen, waerom soude ic langher mijn vlees voorhaer bewaren ende hen gheuen. Doen leyden sy my wederom inde hutte daer sy my bewaerden. Daer ginc ic in mijn net liggen God weet die ellende die ic hadde, ende begost te screyen ende te singen, Nv bidden wi den heyligen geest om den rechten gelooue alder meest, dat hi ons behoeden in onsen eynde als wy henen varen wt deser allende, Kyrioleys. Doen seyden si. Het is een recht portvgaloiser, nv crijt hy, hem grouwelt voor den doot. Die voorgenoemde Francoys bleef daer twee daghen by haer inder hutten, maer den derden daechs reysde hi voortaen ende sy besloten dat si souden gereetschap maken, ende des eersten daechs mi dooden also corts als si alle dingen ge-

[fol. E3v]

reet hadden, ende si bewaerden mi seer neerstelijck ende deden mi veel spots aen so wel ionc als out.