Uvaerachtige Historie ende beschrijuinge eens Landts in America gheleghen, wiens inwoonders Wilt, Naect, seer godtloos, ende wreede Menscheneeters zijn

✠ Hoe si die my gheuanghen hadden claechden dat de Portugaloisers haren vader doer schoten hadden, ende dat sijt aen mi wreken wouden
Dat .XXV. Capittel.

ENde voort seyden si dat die Portugaloisers den vader vanden twee gebroeders die my gheuanghen hadden eenen arm af gheschoten hadden, so dat hi gestoruen, welcken doot haers vaders si aen mi wreken wouden, Daer op seyde ick, wat si dat aen my wreken wouden ick en was doch gheen Portugaloiser, maer ic was corts metten Castillianers daer comen ende hadde schipbrekinghe gheleden, ende was daerom bi haer ghebleven. Daer was een ionck gheselle van haren geslachte, die welcke eer tijts der portugaloisers slaue gheweest hadde. Ende die wilde dye onder de Portugaloisers woonen waren selue in der Tuppin Imba lant ter oorloghen gheuaren, ende hadden den heelen dorp inghenomen ende de oudtste opghegeten, ende wat ionck was hadden si den Portugaloisers voor ware vermanghelt, also dat dese ionghe man den portugaloisers ooc verbuet was, ende was oock inden teghenspoet van Brikioka bi sijnen heere, die welcke Antonio Agudin hiet, wt Galissen Die selue slaue hadden si ghevanghen ontrent drye maent eer sy mi vingen, ende om dat hy van haer geslachte was soo en hadde sy hem niet ghedoot, die selve slave kende

[fol. E2v]

my wel, ende dien vraechden si wat ic voer een man was, Hy seide dattet waer was datter een schip aent lant verloren was ende die lieden dier af comen waren hadden si Castilianen geheeten, ende ware der portugaloisers vrienden metten seluen was ick gheweest voorder en wist hy van my niet. Als ic nv hoorde ende oock te voren verstaen hadde datter Francoysen onder haer waren, ende ooc met schepen daer pleghen aen te comen bleef ick vast op een propost ende seyde: Ick waer der Francoysen goede vrient ende dat si mi ongedoot laten souden so langhe tot datter Francoysen quamen om mi te kennen. Aldus hielden si mi in een seer vaste bewaringhen. Nv waren daer sommighe Francoisen onder haer, die tot den schepen gelaten waren om peper te vergaderen.