✠ Hoe si mi na den danse den Ipperus Wasu thuys brochten
Dat XXIIII. Capittel.
ALs nv den dans een eynde hadde, wert ic den Ipperuwasu ouer geleuert, Daer hielen si mi in vasten bewaringe. Doen seyde hy my ic hadde noch wat tijts te leuen, doen brochten si alle haer afgoden die inder hutten waren ende settese ront om my, ende seyden, die hadden te voren geseyt datmen eenen Portugaloiser vanghen soude. Doen seyde ick, Dese dinghen en hebben gheen macht, ende en connen ooc niet spreken ende lieghen dat ick een Portugaloiser ben, mer ick ben den Francoysen vrienden een ende dat lant daer ick thuys ben heet Alemanien. Daer op seiden si dat ick moeste lieghen, want waert dat ick der Francoysen vrient een waere, wat ick dan onder den Portugaloisers dede, si wisten ooc wel dat Francoisen also wel der Portugaloisers vyanden waren als si, want die Francoysen comen alle iaer metten schepen, ende brachten haer messen bijlen, spiegelen, cammen ende scheeren ende si gauen haer daer voor ander ware, als brasilien hout catoen, vederen ende peper, daerom waren si haer goede vrienden, dwelck die Portugaloisers also niet gedaen en hadden maar si waren in voorleden iaren daer int lant gecomen ende hadden daer al daer si noch woonen onder hare vyanden vrientschap gemaect ende daer na waren si oock tot haer gecomen, ende begeerden met haer te handelen, ende also waren sy wt goeder meyninge aen haer schepen gecomen ende daer in gheclommen ghelijck als si noch dagelijcx inden Francoysen schepen deden, ende seyde, als die Portugaloiser haerder genoech int schip hadden hebben sijse ghegrepen ende ghebonden tot haren vyanden gheuoert, ende die hebbense ghe-
Auteursrechtvrij