Uvaerachtige Historie ende beschrijuinge eens Landts in America gheleghen, wiens inwoonders Wilt, Naect, seer godtloos, ende wreede Menscheneeters zijn

Hoe beyde mijn heeren by my quamen, ende seyden my hoe datse my aen een van haren vrienden gheschoncken hadden, die souden my verwaren, ende dootslaen als sy mi eten wouden.
Dat xxij. Capittel.

ICk en wist hare manieren so wel niet gelijck ickse daer nae versocht ende leerde, dachte daerom aldus, Nv maken sy ghereetschap om mi te doden. Ouer een clein wijle tijts quamen die twee die my geuangen hadden met namen Ieppia Wasu, ende syn broeder Alkindar, Miri ende seyden dat sy mi haren vaders broeder Ipperu Wasu wt vrientschap geschoncken hadden, de selue soude my verwaren, ende mi ooc doot slaen als men my eeten woude, ende hem alsoo

[fol. D8r]

met my eenen name maken, want de selue Ipperu wasu hadde ouer een Iaer oock een slaue gheuangen, ende hadde den Alkindar Miri wt vrientschap geschonken die den seluen doot gheslagen

ende eenen naem daer af gewonnen hadde, also dat daerom die Alkindar Miri dien Iupperu wasu beloeft hadde, dat hy den eersten die hy vanghen soude hem weder schenken soude, die welcke ick was. Voorts seiden die voorgenoemde twe gebroders die my geuangen hadden. Nv sullen de vrouwen v wt voeren a prasse, dat woort en verstonde ick doen niet, euen wel heetet dansen. Aldus togen sy my wter hutten op die plaetse, daer quamen alle die vrouwen die in seuen hutten waren ende grepen my aen, ende het mans volc ginc van daer. Doen leyden my de wijfs sommighe by den armen, sommige metter coorden die ic om den hals hadde, soo hart dat ick nauwelijck mijnen adem cost verhalen so togen sy met my henen ende ick en wist niet wat sy inden sin hadden, met my te doen.

[fol. D8v]

Doen werde ick denckende op dat lijden ons Heren ende verlossers Ieso Christi, hoe dat hy van den snoden Ioden onschuldichlijc lede, daer door trooste ick my seluen ende was des te verduldiger doen brochten sy my voor des Conincx hutten, die vratinge wasu hiet, dat is op Duytsch gheseyt die grote witte voghel. Voor desseluen hutte lach een hoopken versche eerde, daer voeren sy my by, ende setten my daer op, ende sommighe hielden my, daer en meynde ick niet anders sy en souden my daer terstont dootslaen, ende sach om na den Iwara Pemme, daer mede sy die lieden dootslaen, ende doen vraechde ick of sy my corts doden wouden, doen seyden sy noch niet. Daer quam een vrouwe wt den hoop by my, ende die hadde een schijnen stuck van een cristal tusschen een dinc gelijc een ghebogen rijsken, ende scheerde my metten seluen cristal die wijn brauwen van mijn oogen af ende woude my den baert vanden mont ooc af snijden maer ick en woude alsulc niet lijden, ende seyde tot haer lieden dat si mi metten baert dooden souden. Doen antwoorden si mi ende seyden dat sy my nyet dooden en wouden, ende aldus lieten si minen baert noch een wijl tijts behouden. Maer niet te min na sommighe dagen sneden sy mi den baert noch af met eender scheeren, die welcke dye Francoysen haer gheuen met meer ander comenschap voor die ware ende comenschap van hare lande.