Uvaerachtige Historie ende beschrijuinge eens Landts in America gheleghen, wiens inwoonders Wilt, Naect, seer godtloos, ende wreede Menscheneeters zijn

✠Hoe si des daechs met wy om ghinghen ende si my by haer wooninge brochten
Dat .XXI. Cappittel.

[fol. D7r]

DEn seluen dach nae der sonnen te rekenen so wast ontrent vespertijt als wy haer woninghe saghen, ende waren also dry daghen op de vaert geweest want het waren dertich mijlen van Brikioka tot dier plaetsen daer ick henen geuoert werde. Als wy nv heel bi haer wooninghe quamen so wast een dorpken dat hadde thien hutten, ende si noemden dat Vwattibi, wi voeren op eenen oeuer lants, dwelc op de zee leit Daer heel by waren hare vrouwen in haer wortel ghewas, die welcke si Mandioka noemen in desen wortel ghewas ghingen veel van hare vrouwen ende trocken wortelen wt, ende die selue vrouwen die moeste ic aenroepen, ende aldus tot haer segghen A Innesche been er my vramme, dat is in onse Duytsche sprake aldus te segghen, Ick v lieder eten spijse come.

Als wy nv aen het lant quamen liepen sy alle ghelijck tsamen wt haer hutten, die welcke hutten alle gelijck tsamen bi malcanderen op eenen berch ligghen ionck ende oudt om my te besien, ende die mans ghinghen met haren boghen ende pijlen na hare hutten, ende beuolen my haren vrouwen datse my bewaren souden, ende die vrouwen namen my doen tusschen haer, ende daer ghinghender sommighe voor my, ende sommige achter my henen, si dansten ende songhen een ghesanck ghelijck sy den eyghenen lieden pleghen te singen als si die eten wouden. Als si my nv voor die hutten Ywara, dat is voor haer vasticheyt brachten die welcke sy rondt om lanckx hare hutten maken dwelck ghemaeckt is van grooten staken ghelijc als eenen thuyn om eenen hof, ende datmaken si alsoo om haerder vyanden wil. Als ic nv daer in

[fol. D7v]

quam, liep dat vrouwen volc tot my, ende sloegen my met vuysten, ende trocken my metten baert ende spraken in harer sprake aldus, Sche in gamme pe pike a te, dat is te seggen: Dien slach geve ick v van mijns vrients wegen, tot synder wraken, dien sy lieden gedoot hebben daer ghy gheweest hebt, Daer na voerden sy my inder hutten, ende daer moest ick in eene Iuni liggen, daer quamen de vrouwen voor ende na sloegen en de crabden my ende dreychden my hoe datse my eeten wouden, So was dat mans volc by malcanderen ende droncken den dranck den welcken sy Kawi noemen, ende hadden hare Gode Tamerka genaemt by haer, ende songen henlieden ter eeren dat sy haer ghepropheteert ende voorseyt hadden dat sy my vangen souden. Alsulck gesanghe moeste ick hooren, ende daer en quam in een half vre geen mans volck by my, dan vrouwen ende kinderen.