Uvaerachtige Historie ende beschrijuinge eens Landts in America gheleghen, wiens inwoonders Wilt, Naect, seer godtloos, ende wreede Menscheneeters zijn

Hoe sy met my wederom achterwarts wouden varen, ende de onse anquamen meinende my haer weder te ontnemen, ende sy haer weder tot haer keerden, ende scharmutselden met hen lieden.
Dat xix. Capittel.

DAer leyt een clein eylandeken daer by daer ick gheuangen was, daer water vogelen in nesten, die Vwara heeten, ende hebben rode Pluymen, daerom vraechden sy my oft haer vyanden die Tuppin Ikins dat iaer oock daer gheweest hadden ende die Vogelen by haren Ionghen gheuanghen hadden, doen seyde

[fol. D5r]

ick ia, Maer sy woudent euen wel besien, want sy de pluymen van groter weerden achten die van dien vogelen comen, want alle haer cieraet is gemeynlijck vanden pluymen ghemaeckt, ende der voorgenoemder vogelen Vwara natuere is, dat haer eerste vederen oft pluymen die haer wassen wit grau syn, Maer die ander vederen die haer daer na wassen syn swart grau, ende daer mede vlieghen sy omtrent een iaer lanck ende daer na worden sy root gelijck als rode verwe. Aldus voeren na dat eylant toe, meynende dese vogelen te vanghen, Maer als sy nu ontrent twe bussen schueten wijt vanderplaetsen comen waren daer sy haere naeckers staen hadden so saghen sy achterwaerts daer wast doen vol van den wilden Tuppin Ikins, ende oock sommighe Portugaleusers onder haer, want wy volchden een slaue doen ick geuangen wert, maer de selue ontquam haer, ende hadde eenen allarm ghemaeckt, alsoo dat sy my meynden te verlossen, roepende totten ghenen die my gheuangen hadden, waert dat sy cloeck waren dat sy weder keeren ende tegen haer schermutzelen souden, Ende sy keerden metten naecken wederomme tot henlieden aent lant, ende die opten lande waren, schoten met roeren offte bussen ende met pijlen na ons, ende die inde Naecken wederom tot haer, ende ontbonden my doen mijn handen, maer die coorden die ic om den hals hadde die waren noch vast gebonden, so hadden nu die Coninc des Nakers daer ic in was een roer, ende een weynich puluer, twelc een Francois voor brasilien hout gegeuen had, nu moest ic op die aentlant waren affschieten, Als sy nu een wijle geschermutzeert hadden, doen sorchden sy dat haer die ande-

[fol. D5v]

re oock met naeckers verstercken ende haer na iagen souden, ende voeren daer om van daer waren dry van haer lieden geschoten, ende si voren omtrent een schuet van een Valckenet verre van den Bolwerck te Brikioca henen daer ick in plach te sien, ende doen wy daer voorbi voeren moest ick den naecken ouer eynde staen, dat my mijn gesellen sien costen. Doen schoten sy wten bolwercke twe grote stucken op ons, maer sy schoten te cort, in midler tijt quamen sommige naeckens ons na geuaren van Brikioka, meynende sy wouden ons achter halen, maer sy roeyden te rasch wech. Als die vrienden sagen dat sy niet helpen costen, keerden sy weder na brikioca.