Uvaerachtige Historie ende beschrijuinge eens Landts in America gheleghen, wiens inwoonders Wilt, Naect, seer godtloos, ende wreede Menscheneeters zijn

[fol. D3r]

Hoe ick vanden wilden gheuanghen wert, ende hoe dat het selue toe ginck.
Dat xviij. Capiittel.

ICk hadde eenen wilden man vanden geslachte diemen Carios heet, ende die was mijn eyghen, die selue vinck my wilt, ende ick ginc oock somtijts mee hem int wout. Alsoo gebuerdet op een tijt, dat een Spangiaert wt den Eylande van sinte Vincent tot my quam in dat Eylant sanct Maro, het welck vijf mijlen vanden Bolwercke is daer ick in woonde, met noch een Duytsche, die welcke hiet met name Heliodorus Hessus, Eobani Hessi saliger gedachten sone, ende die selue was in dat Eylant sancte Vincente, in een Ingenio daermen Suycker maket, ende in den Ingenio was een Geneuoysen die Iosephe Ornio heet, ende deze Heliodorus was der Cooplieden schrijuer ende beschicker die totten Ingenio behooren, Ingenio dat syn huysen daer men het suycker in maect, metten seluen Heliodo-

[fol. D3v]

ro hadde ick te vooren meer kennisse ghehadt, want doen ic metten Spaengiaerden den schipbrueck daer onder dat lant leet, so vant ic hem daer in dat eylandt van sinte Vincent, ende hi bewees my ooc vrientschap Aldus quam dese ooc tot my, ende woude besien hoe dat my ginck, want hy hadde mogelijck gehoort dat ic cranc was. Ick hadde mijn slaue dien dach te voren int wout gesonden om wilbraet te vangen. Ick woude dat des anderen daechs comen halen, op dat wy wat mochten te eten hebben want men daer in dat lant niet veel meer en heeft dan wat wter wildernisse comt Als ic nv door dat wout ginck, verhief hem op beyden sijden des weechs een groot gescrey op der wilden lieden maniere, ende quamen tot my in geloopen, ende si hadden mi rondt om omrinct ende haer bogen op mi met pijlen gehounden ende schoten tot mi in: Doe riep ic nu help God mijnder sielen Ic en hadde dat woort nu so rasch wt geseyt, si sloegen mi ter eerden, schoten ende staken op mi nochtans en wonden si mi niet meer, God lof, dan in een been ende schoorden mi mijn cleederen vanden lijve die eene die hals kappe, die ander den hoet die derde dat hemde ende so voort aen ende begosten doen te kijuen om mi, die eene seide hi was eerst bi mi geweest die ander seide hi hadde mi geuangen, ende te wijle sloegen mi die andere met haer bogen Noch ten lesten so hieuen mi twee van haer lieden vander aerden daer ick so naect was, die eene nam mi by den eenen arm, die ander by den anderen arm ende sommighe achter mi ende liepen alsoo met my haestelijc door dat wout na de zee toe, daer si hare naeckers hadden Als sy mi nv by de zee brochten, daer sach ic doen ontrent eenen steenworp verre haer naeckers staen die sy wt der zee opt landt ghetoghen hadden om

[fol. D4r]

der een hage, ende noch eenen anderen grooten hoop wilde daer by Als my die selve saghen daer henen leyden liepen sy my alle teghen, ende waren verciert met pluymen, op haer maniere, ende beten in haer armen ende dreychden my also, dat si mi eten wouden ende daer ginck een coninck voor my henen metten houte daer si de geuangen mede doot slaen. Dese predicte ende seyde hoe si mi haren slaue den Perot, want also heeten si die Portugaloisers als sijse gheuanghen hadden, eten wouden, ende haerder vrienden doot aen mi wreken. Ende als si mi bi den naecker hadden ghebrocht, so stieten my haerder sommighe met voeten Doen haesten si haer helpende malcanderen dat si die naecker wederom int water schouen, want si hadden sorge dat in Brikioka eenen alarm, worden soude, also dat oock geschiede Maer eer si die naeckers weder van dat lant inden watere schouen, so bonden si mi eerst die handen tsamen ende si en waren hier al tsamen wt een wooninghe, Een yegelijck aldea vanden anderen verdroot dat hy soude ledich thuys waert varen, ende keuen metten tween die my behielden. Sommige seyden si waren effen also na by my geweest als sy, ende wouden my daer gelijc op der stede dootslaen, daer stont ic ende badt, ende sach om na den slach, maer ten lesten hief die coninc aen die my behouden woude, ende seyde sy wouden my leuendich thuys voeren, op dat my haer wijfs ooc leuendich sien souden, ende haren feestdach met mi houden mochten, want dan wouden sy my Kawewi pepirke doden, dat is sy wouden dranck maken, ende haer vergaderen om eenen feestdach te maken ende souden my dan met malcanderen eeten.

[fol. D4v]

By dien woorden lieten sijt blijuen, ende bonden my vier stricken oft coorden om den hals, ende doen most ick inden naecken climmen, ter wijlen sy noch opten lande stonden ende bonden die eynden vanden coorden aen den Naeckers, ende schouense wederom na die zee, om daer mede weder thuys waert te varen.