Uvaerachtige Historie ende beschrijuinge eens Landts in America gheleghen, wiens inwoonders Wilt, Naect, seer godtloos, ende wreede Menscheneeters zijn

✠ Hoe dye plaetse heet van daer haer dye meest veruolghinghe vanden vyanden gheschiet ende hoe datse gelegen is
Dat .XV. Capittel.

DAer leyt eenen hoeck lants, vijf mijlen van Sinte Vincente dat heet Brikioka op dese plaetse comen haer vyanden die wilde lieden neerstelijck aen, ende varen tusschen een eylant dat S. Maro heet ende den vasten lande door Om dese vaert te benemen, stelden haer sommige mammeluiken dat gebroeders waren ende haer vadere was een portughaloiser ende haer moeder was een Brasilische Vrouwe.

[fol. C8v]

dese waren Christenen gheschiet ende veruaren beyde inder Christenen ende inder wilden aenslagen ende spraken Die oudtste hiet Iohan de Praga, die ander Diego de praga, de derde Domingus de Praga die vierde Francisco de Praga, die vijfde andreas de Praga ende haer vader Diago de praga, Dese vijf ghebroeders hadden voor haer ghenomen ontrent voor twee iaer eer ick daer quam, mede noch ander wilde lieden, dat haer vrienden waren, dat sy daer en vasticheyt maken souden teghen de vyanden, op der wilden lieder maniere, twelck sy oock gedaen hadden, daerom waren oock sommighe Portegaleusers tot haer getogen om daer te wonen, aengesien dattet een fijn lant was, ende dat selue hadden hare vyanden bespiet, de Tuppin Imba, ende hadden haer in haren lande daer op toe gherust, dwelck omtrent xxv. mijlen van daer begint, ende waren op eender nacht daer aen comen, met lxx. naeckens oft schuyten, ende haddense gelijck haer maniere is in eender vren voor den doge aengeuallen, ende die Mamaluycken tsamen metten Portegaloysers waren in een huys ghelopen, dwelck sy van eerden gemaeckt hadden, ende haer daer geweert Die ander wilde lieden hebben haer in haer hutten by een gehouden, ende haer also lange geweyrt als sy costen, so datter veel van haer vyanden doot bleuen, maer ten lesten creghen die vyanden die ouerhant, ende ende hebben die stadt Brikioka aengesteecken, ende alle die wilde gheuangen, maer den Christenen welcken ontrent acht mochten gheweest syn, ende den Mammeluycken en hadden sy niet doen connen inden huyse, want Godt wildese bewaren Maer die ander wilde die sy ge-

[fol. D1r]

vangen hadden, hebben sy terstont van malcanderen gesneden ende gedeylt, ende syn daer na weder om in haer lantschap getrocken.