Uvaerachtige Historie ende beschrijuinge eens Landts in America gheleghen, wiens inwoonders Wilt, Naect, seer godtloos, ende wreede Menscheneeters zijn

Hoe die Portugaleusers Brikioka wederom opgherecht hebben, ende daer nae een Bolwerck in dat Eylandt Sancte Maro maecten.
Dat xvi. Capittel.

DAer na dochtet den ouersten ende der gemeynten goetsyn datmen den seluen hoec niet en verliete, maer datmen daer in bouwen soude op het stercste, want men van daer dat gantsche landt beschermen conde, alsulcx hebben sy oock begost ende volbrocht. Als die vyanden sulcx merckten oft ghewaer werden, dat die stercte Brikioco haer te sterc was, voeren sy des

nachts euen wel voor die stercte ouer ende namen voor haren buet alle die sy crijgen costen rontom

[fol. D1v]

sancte Vincente, ende want die so binnen in lant woonden meynden dat si gheen noot en hadden, midts dat die stercte daer tegen oprecht was ende vast ghemaeckt so leden si daer ouer schade, daer na dachten die in woonders dat si noch een huys oft stercte maken souden, vast op het water, int eylant sanct Maro, dwelck recht teghen Brikioka ouer lach, ende dat si daer in gheschut ende volc legghen souden om alsulcke vaert den wilden te beletten. Aldus hadden si nv een bolwerck in dat eylant begost, maer niet voleynt, ende dat om alsulcker oorsaken wille ghelijck sij my berechten dat haer op dat pas gheen Portugaloise busschieters daer in auontueren en wouden. Ic was daer om dat ick den hoeck des lants besien soude. Als die inwonders hoorden dat ic een Duytsch was ende dat ick my wat op gheschut verstont, begheerder sy van mi oft ik woude in dat huys in dat eylant sijn, ende daer die vyanden helpen wachten sy souden my ghesellen beschicken, ende een goede bescholdighe gheuen. Ooc seyden si mi waert dat ickt dede, ick soudet vanden Coninck ghenieten, want de Coninck plach sonderlijcken dien, dye in sulcke nieuwe landen raet ende hulpe ghauen, haer een genadich heer te wesen, Ic werdes met haer lieden eens, dat ic vier maenden lanc in dat huys dienen soude ende daer na soude een ouerste van des Conincx wegen daer comen met schepen, ende daer een steenen blochuys in maken dwelck dan stercker sijn soude also dat oock gheschiede. Den meesten tijt was ic int blockhuys met mijn derde, ende hadde een luttel gheschuts by my. Ick was in grooter vreesen om der Wilden wille dat huys en was niet sterck, ende wy moesten daer

[fol. D2r]

om oock vlijtelijck wacht houden op dat die wilde niet heymelijc inder nacht voor by varen en souden, want si dat somtijts versochten, niedt te min God halp ons dat wy haerder ghewaer werden inder wacht, Nae sommighe maenden quam die ouerste van des Coninck weghen, want die ghemeynte hadde den Coninc geschreuen wat grooten hoochmoet haer die vyanden aen dien hoeck des lants deden, ende hoe schoonen lant dat was ende daerom oock niet profijtelijck en ware dat men dat soude verlaten. Om dan dat te verbeteren quam die ouerste Thomas Sussa genaempt, ende besach den hoeck lants, ende die stede die de ghemeynte gheerne vast ghemaect hadde. Daer seyde hem die gemeydte vanden dienste die ick haer ghedaen hadde, ende hoe ick my daer in dat huis begheuen hadde, daer doch anders gheen Portugaloiser in en woude sijn, ouer mits dat het qualijck vast gemaect was, Dat selue behaechde hem seer wel, ende seyde, hy soude mijn sake den Coninc vertellen als hem God weder in Portugael hielpe, ende ic soude des ghenieten. Mijnen tijt die ic der ghemeynten hadde toe geseyt te dienen was wt, namelijck vier maent, ende ick begeerde oorlof. Maer die ouerste tsamen met ter ghemeynten begheerden dat ick noch eenen tijt lanck in dien dienst blijuen soude. Daer op ic met hen lieden eens wert noch twee iaer te dienen ende als dien tijt om waer, soudemen my sonder eenich hinderen metten eersten schepen daer ic in comen cost, laten nae Portugal zeylen daer soudense my vergenogen. Daer op gaf my die ouerste van des Coninc weghen mijn Priuilegien, soo dat die maniere is te gheuen des Conincx busschieters die dat begheren. Sy maecten dat steenen bolwerck, ende leyden daer sommighe stucken gheschuts in.

[fol. D2v]

My wert beuolen goede wacht ende toesien daer in te hebben.