Uvaerachtige Historie ende beschrijuinge eens Landts in America gheleghen, wiens inwoonders Wilt, Naect, seer godtloos, ende wreede Menscheneeters zijn

¶ Hoe Sancte Vincent gheleghen is.
Dat XIIII. Capittel.

[fol. C8r]

SAncte Vincente is een eylant, leyt vast byden vasten lande, daer in sijn twee stedekens, een inder Portugaloisers sprake ghenaemt Sancte vincente, maer inder wilden sprake heetet Orbioneme, dat ander is ontrent anderhalf mijle van daer, ende heet Iwawasupe nv ligghen daer noch sommighe huysen in, die heeten Igenio, inde selue maectmen suicker. Ende de Portugaloisers die daer woonen hebben een natie van Brasillianen te vriende die de tuppin Ikin heeten ende dier natien lant streckt hem lxxx mijlen weechs lancx dat lant inne, ende lanx der zee ontrent xl. mijlen. Ende dese Natie hebben op beyde sijden vyanden, nae der Suytsijden ende ooc na der Noodtsijden hare vyanden opte Suydtsijde heeten Corios. en die vyanden op der Noordtsijden heeten die Tuppin Imba, oock worden si van haer vyanden Twariar geheeten dat is vyanden te seggen Die selue hebben den Portugaloisers veel schaden ghedaen, ende moeten haer noc op deser tijt voor haer wachten.