Uvaerachtige Historie ende beschrijuinge eens Landts in America gheleghen, wiens inwoonders Wilt, Naect, seer godtloos, ende wreede Menscheneeters zijn

✠ Hoe wy gewaer werden in wat lantschap der wilden lieden, wy waren daer wy den schipbrueck geleden hadde
Dat .XIII. Capittel.

[fol. C7v]

ALs wi nu aen lant comen waren dancten wy God dat hi ons leuendich hadde te lande laten comen, waren ooc niet te min bedroeft, om dat wi niet en wisten waer wy sijn mochten, ter wijlen die Roman dat lant niet recht en kende oft wi verre oft by dat eylant sancte Vincte waren ende oft daer oock wilde lieden woonden daer wy schade af lijden mochten, soo liep een van onsen mede gesellen, met name Claudo. ende was een Francoys, lancx den oeuer henen, op dat hy hem verwermen mochte, ende sach een dorp achter den bossche ligghen, daer in die huysen ghemaeckt waren op der Cristenen maniere ende hy ginc daer henen doen sach hi dat een dorp was ende dat ter Portugaloisers in woonen, ende heet met name Itenge Ehem, ende is twee mijlen van sancte Vincente doen seyde hi henlieden, dat wi hadden eenen schipbruec gheleden, ende dat het volc seer vervroesen was, ende en wisten ooc niet waer wi henen souden. Als sy dat hoorden quamen si wt geloopen, ende namen ons met haer in haer huysen ende cleedden ons, Aldus bleuen wy daer sommighe daghen tot dat wy weder tot ons seluen quamen. Van daer reysden wi ouer lant na sancte Vincente, daer deden ons die Portugaloisers alle eere aen, ende gauen ons een tijt lanc den cost. Daer nae begost een yeghelijck wat te doen daer hi hen op onthielt. Als daer doen sagen dat wi alle onse schepen verloren hadden, soo schickte die hooftman een Portugaloisere schip na ons ander volck dwelck noch achter bleuen was in byasape, om die selue ooc derwaert te brengen de welc oock also geschiede.