Uvaerachtige Historie ende beschrijuinge eens Landts in America gheleghen, wiens inwoonders Wilt, Naect, seer godtloos, ende wreede Menscheneeters zijn

[fol. C6r]

✠ Hoe wy van rade werden ende voeren na sinte Vincent daer die portugaloisers dat lant in hebben, ende meyndden noch een schip te bevrachten van hen lieden, ende daer mede onse reise te eynden, leden door grooten storm vander ze schipkrekinghe ende en wisten niet hoe verre dat wy van sinte Vincent waren.
Dat .XII. Capittel.

NU hebben die Portugaloisers een eylant harde by den vasten lande inghenomen dat heet sancte Vincente inder wilden sprake Vrbioneme, De selue Prouincie leyt ontrent LXX. mijlen vander plaetsen daer wy waren Onse meyninghe was derwaerts te varen ende te besien of wy costen van den Portugaloisers een schip te beurachten crijghen om in Rio de Platta te varen, want dat schip dat wy noch hadden was ons allen om daer in te varen veel te cleyn. Om dat te vorderen voeren onser sommighe, metten capiteyn Salaser ghenaempt na dat eylant sancte Vincente, ende onser gheen en hadden daer meer gheweest dan een die Romain hiet, ende die liet hem duncken dat hy dat landt wel wederom vinden soude.

Wy seylden wter Hauenen Inbiassape ghenaempt, de welcke leydt xxxiij. gradus, ende een half Suytwaert equinoctiael, ende quamen ontrent twee daghen na onser wtuaert, by een Eylandt genaempt Insula de Alkatrases, ontrent xl. mijlen, van daer wy wt geuaren waren, ende daer wert ons den wint also teghen dat wy daer by moesten Anckeren.

In dat selue eylant waren seer veel vogelen diemen

[fol. C6v]

alkatrases heet, ende die sijn lichtelijck te vangen soo wast nu oock den tijdt dat sy broeyden ende ionghe op brochten, Daer ghingen wi aent lant ende sochten soet water in dat eylandt ende vonden daer oude hutten, ende der wilden pot scheruen dye in voorgaende tijden in dat eylandt gewoont hadden ende vonden oock een cleyn waterken op een clippe. Daer sloeghen wy vanden voghelen veel doodt, ende namen oock van haer eyeren met ons int schip, ende koeckten de vogelen ende eyeren om te eten. Als wy nv gheten hadden verhief hem eenen grooten storm windt van den Suyden, dat wy nauwelijck den ancker behouden en costen, alsoo dat wy sorchden dat ons de wint op een clippe doen slaen soude die selue was teghen avondt, ende wi meynden noch in een hauen te comen dye Canince geheeten was, maer eer wy daer by quamen wast nacht, ende en costen niedt daer in comen, maer wy voeren af vanden lande met ghrooter vreesen, ende meynden oock niedt anders, dye baren souden dat schip ontstucken slaen, wandt het was aen eenen hoeck landt daer altoos die baren ghrooter sijn dan midden int diepte vander zee, ende verre vanden landen. Ende wy waren dien nacht soo verre vanden lande comen, dat wy des morghens dat niet sien en costen niet te min nae lange varen creghen wi dat landt weder int gesicht, maer den storm was soo groot dat wy ons nauwelijc langher onthouden en costen. Dye selue de meer in dat landt gheweest hadde, liet hem duncken doen hy dat landt sach, dat het sancte vincente was ende voeren daer recht toe. Daer werdt dat landt alsoo met neuel ende wolcken bedect, datment niet wel kennen

[fol. C7r]

en cost. Wy moesten doen al wat swaer was inde zee worpen ende dat schip lichter maken om de groote baren wil.

Alsoo waren wy in grooter sorghen, ende voeren voort, meynde die hauene te treffen daer die Portugaloisers woonen, maer wy faelgeerden. Als nv die wolcken een weynich op braken datmen dat landt sien coste, so seyde die Roman, hy liet hem duncken die hauene was voor ons, dat wy recht na een clippe varen souden wandt die hauene lach daer achter, aldus voeren wi daer bi maer doen wy vast daer by quamen, en sagen wy niet dan den doodt voor oogen, want het en was die hauene niet, ende moesten recht opt lant varen ende schipbrekinge lijden om des wints wille: die baren sloegen teghen dat landt datmen hem grouwelen mocht Doen baden wi God om ghenade ende hulpe voor onse siele, ende deden als schipuarende lieden toe behoort, die schipbrekinge lijden moeten. Als wy nv so quamen daer die baren aent lant sloegen voeren wy so hooge op de baren henen, dat wi steyl nederwaerts af lagen, als oft wy van eener muer ghesien hadden, Met de eersten stoot die dat schip aent lant dedeghinghet van malcanderen. Doen spronghen sommighe daer wt, ende swommen aent lant, onser sommighe quamen op de stucken te lande ende also halp ons Godt alle leuendich aen lant, ende het regende ende waeyde, so seer, dat wy heel vercout waren.