Uvaerachtige Historie ende beschrijuinge eens Landts in America gheleghen, wiens inwoonders Wilt, Naect, seer godtloos, ende wreede Menscheneeters zijn

✠ Hoe ick ghesonden wert met eenen Naecken vol wilder lieden tot ons groot schip.
Dat x. Capittel.

DAer nae badt onse Capiteyn den man de wy onder den wilden vonden dat hy eenen Naecken met volc bestelden, die souden een van ons by dat groot schip voren op dat het oock by hen lieden soude comen. Daer schickte my die Capiteyn metten wilden lieden nae den schepe, ende wy waren drie nachten wt geweest, dat die vanden schepe niet en wisten hoe dat met ons was oft stont. Als ick nu met een naecken op eenen boge schuet weechs na op den schepe quam, maecten sy een groot geschrey, ende stelden haer ter weyre ende en wouden niet dat ic metten naecken naerder quam, maer sy riepen my toe hoe dat toe ghinck, ende waer dat dat ander volck bleef, ende hoe ic also mitten Naecken vol wilder lieden quam, maer ick sweech stille, ende en ghaf henlieden gheen antwoorde, want die Capiteyn hadde my beuolen dat ick my truyrich ghelaten soude, om te mercken wat die soo noch int schip waren doen wouden. Als ick haer nu niedt en

[fol. C5r]

antwoorde, riepen sy onder malcanderen: het en is niet recht om der saecken, die ander moeten doot zijn, ende sy comen met desen eenen, hebbende moghelijck noch meer volcx achter, om ons schip in te nemen, ende wouden schieten, maer doch riepen sy my noch eens aen, ende doen begoste ick te lachene, seggende sijt te vreden, goede nieuwe tijdinghe, laet my naerder comen soo sal ick v alle dingen berichten.

Daer na seyde ick haer hoe dat metter saecken stont, des verblijden sy haer seer, ende de Wilde voeren met haren Naecken wederom na huys, ende wy quamen metten grooten Schepen heel na byder wilden woninge, ende daer lieten wy eenen Ancker te gronde ende laghen daer ende wachten op die ander schepen, die daer door den storm wint van ons verlooren hadden, die noch comen souden, ende dat dorp daer die wilden waren, heet Acutia, ende die man die wy daer vonden heet Iohan Ferdinando, ende was een Bosschayor, van der stadt Bilbau, ende die Wilden die daer waren, heeten Carios, dese brachten ons veel wilts vleesch ende visch, daer voor ghauen wy haer hengelhaken.