Uvaerachtige Historie ende beschrijuinge eens Landts in America gheleghen, wiens inwoonders Wilt, Naect, seer godtloos, ende wreede Menscheneeters zijn

[fol. C3r]

Hoe dat onser sommighe metten Boot voeren om die hauen te besien, ende vonden een Crucificx op eender Clippen staen.
Dat ix. Capittel.

ENde het was op sinte Catarinen dach in den iare M.CCCCC. ende xlix. als wy den ancker te gronde lieten. Ende op den seluen dach voeren onser sommighe wel gerust om die hauene voorder te besoecken metten boot, ende lieten ons duncken het moeste een riuiere syn, diemen hiet Rio de sancto Francisco, want die leyt ooc inder seluer Prouintien, maer hoe wy voorder daar in voeren, hoe de riuiere langer was, ende wy sagen rontom, herwaerts ende derwaerts, of wy oock een igen roock sien costen, maer wy en sagen gheenen, Doen docht ons wy sagen hutten voor een Wildernisse in een valieye ende voeren daer by, doen warent oude hutten, ende en vernamen geen lieden daer in, ende voeren voort aen, soo dat auont wert, ende daer lach een cleyn eylant voor ons inde riuiere, daer voren wy aen om dien nacht daer te blijuen, ende hoopten het beste te verwachten, Als wy by dat Eylant quamen doen wast nacht, ende en dorftens niet wel auontueren, dat wy hadden aen dat lant gegaen om dien nacht daer te rusten, niet te min gingen onser sommighe rontom dat eylant, om te besien of oock yemant daer in geweest hadde, maer wi en vernamen daer niemant. Wy maecten vier, ende hieuen eenen Palm boom af, ende aeten die keernen daer af, daer mede onderhielden wy ons dien nacht. Des morgens voeren wy voorts te landewaert in, want onse meninge was heel dat wy weten wouden, of daer

[fol. C3v]

oock lieden waren, want om dat wy die oude hutten ghesien hadden lieten wy ons duncken datter uoortijs lieden int lant moesten geweest sijn, Als wy nu also voortvoeren, sagen wy van verre een hout op eender clippen staen, dat scheen gelijck als een cruys, alsoo dat sommighe dachten wie dat daer gebracht mocht hebben. Wy voeren daer by ende doen wast een groot houten Cruys, met steenen vasticheydt opter Clippen vast ghemaeckt, ende een stuck bodems van eenen vate, was daer aen gebonden, ende inden Bodem waren letteren gesteecken of ghesneden, maer wy en costens niet wel gelesen, ende wy verwonderen ons wat dat voor schepen mochten gheweest syn, die sulcx daer op gerecht hadden, want wy en wisten niet dat dit de hauen was daer wy ons versamen souden. Daer na voeren wy weder voort aen innewaert van het cruys, om noch voorder landt te soecken. Den bodem namen wy met ons, ende als wy nu voert voeren so sadt daer een neder ende las die letteren op den vat bodem, ende begostse te verstaen. Daer was op gesneden in spaensche spraecke aldus: SI REHV POR VENTVRA ECRI LA ARMADa DE SV MALES TET. TIREN NV TIRE AL AVeRaN ReCaDO Dat is in duytsche aldus gheseyt. Oft hier by auentueren sijnder Mayesteyt Schepen quamen die schieten een stuck Gheschuts af, soo sullen sy breder bescheet crijgen. Ende aldus voeren wi snellicken wederom by dat Cruys, ende schoten een cleyn valckenet af, ende voeren doe weder in waerts, doe saghen wy vijf naeckere vol wilder lieden, die stracx nae ons quamen geroeyet, ende daerom hadden wy ons gheschut al bereyt ghe-

[fol. C4r]

maeckt, Als sy nu nae by ons quamen, sagen wy eenen mensche die clederen aen hadde, ende eenen baart hadde, dese stont voor in den Naecken, ende wy kenden daer aen dat hy een kersten was.

Doen riepen wy dat hy stil houden soude, ende met eenen naecken by ons comen soude om sprake te houden. Als hy nu aldus na by ons quam, soo vraechden wy hem in wat lantschap dat wy waren, Doen seyde hy: Ghy syt inder hauenen Schirmereyn genaemt, ende heet also op der wilder luyden sprake, ende seyde, op dat ghyt beter verstaen meucht, so heetet sinte Catharijnen hauene, welcke naem hem gegeuen is vanden genen diese eerst geuonden hebben. Doen verblijden wy ons, want dat was die haven die wy sochten, wi waren daer in, ende wy en wistens niet, ende wy quamen op sinte Catharinen dach in der seluer hauenen. Hier hoort ghy hoe Godt den ghenen helpt die in noden sijn, ende hem neerstelijck aenroepen, Daer na vraechde hy ons van waer dat wy waren. Doe seyden wy hem, dat wy van des Conincx Schepen waren van Spaengien, ende souden na Rio di Platta varen. Oock waren daer noch meer schepen opte reyse, ende wy hopen (ist dat Godt belieft) sy sullen oock haest comen, ende op die selue plaetse souden wy ons versamelen. Doen seyde hy dattet hem seer wel behaechde ende danckte Godt.

Maer hy was voor drie Iaren (wt die Prouintie Rio di Platta vander Stadt diemen hiet la Soncio, die welcke die Spangiaerden in hebben) af ghesonden aen der Zee, dwelck is CCC. mijlen weechs, dat hy soude die natie diemen heet Carios die de Spangiaerden te vriende hebben,

[fol. C4v]

daer in houden dat sy wortelen planten die Mandioka heeten, op dat de Schepen daer wederomme mochten by den wilde dieren victalie crijgen waert dat sy gebreck hadden twelck de hooftman also bestelde, ende de nieuwe tijdinge in Spaengien ghebracht hadde, met name gheheten Capiteyn Salasar, die oock metten anderen schepen weder quam. Wy voeren met hen lieden binnen inden hutten, daer hy onder de wilde woonde ende deden ons redelijck na haer maniere ende wijse.