Uvaerachtige Historie ende beschrijuinge eens Landts in America gheleghen, wiens inwoonders Wilt, Naect, seer godtloos, ende wreede Menscheneeters zijn

✠ Wtuaringe mijnder tweeder schipuaert in Ciuilien wt Spaengien in America.
Dat .VI. Capittel.

IN den Iare ons Heeren 1549, den vierden dach na Paesschen seilden wy van sint Lucas, ende de wint was tegen, wi namen te Lisbona hauene. Als dye wint goet werdt voeren wy na dat eylant van Cannarien, ende anckerden by een eylant Pallania genaemt, daer namen wy wat wijns int schip voor die reyse. Oock soo werden die stuerlieden vanden schepen daer eens, als sy inder Zee vanden anderen schieden, waer sy int landt wederom by malcanderen comen souden, namelijck in xxviij graden opter Suydt, syden, der linien equinoctiael

Van Palma voeren wy na Cape vierde, dat is dat groen hoot, het welcke leyt inden swerten mooren lant ende op die selue plaetse hadden wy by cans eenen schipbrueck gheleden

[fol. B8v]

Van daer voren wy met onsen cossz, ende de wint was ons tegen, ende sloech ons somtijts op dat landt Gene, int welcke oock swarte moren wonen, daer na quamen wy in een Eylant geheten sanct Thome, ende dat hoort den Coninck va Portugael toe, ende is een suycker-rijck lant maer seer ongesont, daer wonen Poortegalensers in, ende die hebben veel swarte Moren dat daer eygen lieden syn. Wy namen versch water in dat Eylant, ende seylden voort aen, Wy hadden onser twe mede gesellen schepen in eenen storm wint des nachs wt den gesichte verloren, also dat wy alleen seylden, want de wilden waren ons seer tegen, ende sy hebben die natuyr inder Zee, dat als de sonne op ghaet op die nootzijde der lijnien Equinoctiael, so wayen die winden van zuyden herwaerts.

Desgelijcx als die Sonne op der suyt syde gaet, comen sy van der noort syden Sy hebben oock die natuyre datse vijf maent hart wt eenderley gewest waeyen, ende hinderden ons also vier maent dat wy onsen rechten Cossz niet seylen en mochten, als die maent september aen quam, begosten de winden noordelijck te wayen, Wy setten onzen Cossz oft streeck suyt suytwest na Aemerica toe.