Uvaerachtige Historie ende beschrijuinge eens Landts in America gheleghen, wiens inwoonders Wilt, Naect, seer godtloos, ende wreede Menscheneeters zijn

☞ Hoe wy wt brannenbucke voeren nae een lantschap Buttegaris ghenaemt, ende by een franchoys schip quamen, ende met haer slogen.
Dat V. Capittel.

UAn daer voeren wy veertich mijlen tot eender hauenen Buttagarus ghenaemt, daer meenden wy dat schip met Bresilien hout te laden, ende den wilden meer victalien af te mangelen. Als wy daer by quamen,

[fol. B7r]

vonden wy een schip wt Vrancrijck dat laeyde bresilien houdt, Daer seylden wy aen meynen-

de dat te nemen maer sy bedoruen ons den grooten mastboom met eenen schuete, ende ontseylden ons Sommighe van onsen schippers werden gheschoten, ende sommighe ghewondt.

Daer nae werden wy vanden sin wederom nae Portugael te varen, maer wy en conden niet wederom te winde waert ghecomen in der hauenen daer wi meynden victalie te crijgen Die windt was ons teghen, ende wy voeren met so luttel victalien na Portugael, lijdende groten honger. Die sommige die aten boeken huyden die wy int schip hadden, Men gaf ons een yegelijck des daechs een nootschelpe vol waters, ende een luttel Brasilische wortelen meel. Wy waren C. ende acht daghen inder Zee. Den xij. Augusti quamen wy in Eylanden die genaemt zijn Losa Seres, die behoren die Coninck van Portugael toe, Daer anckerden wy ende visten.

[fol. B7v]

Op die selue plaetse sagen wy een schip inder Ze daer wy by voeren om te weten wat voer een schip was, ende dat was een zeerouer. Hy stelde hem te were, nochtans cregen wy die ouerhandt ende namen hem lieden dat schip, si ontuoeren ons met eenen boot na die eylanden. Dat schip hadde veel wijn en broots, daer mede wi ons vermaecten Daer nae quamen wy by vijf schepen die den Coninck van Portugael toe hoorden, die onder byde eylanden wachten op die schepen dye wt Indien souden comen om dye in Portugael tegheleyden, daer bleuen wy bi, ende hilpen een Indische schip, dwelck daer, aen quam, gheleyden in een eylandt Tercera ghenaempt, ende daer bleuen wy. Daer waren in dat eylandt veel schepen vergadert die welcke alle wt die nieuwe landen ghecomen waren, waer of dye sommighe wilden nae Spaengien varen, ende dye sommighe wilden nae portugael varen, Wy voeren wt Tercera by nae hondert schepen in een gheselschap, ende wy quamen te Lissebona aen ontrent den achtsten dach van October, inden iare des Heeren alsmen schreef. M.CCCCC. ende achten veertich Wy waren .xvi. maenden lanc op die reyse geweest. Daer na so ruste ick my een goede wijle tijts lanck te Lissebona, ende daer werde ick vanden sin dat ick metten Spaenghiaerden inde nieuwen Lande varen soude, dye welcke si in ghenomen hebben, ende voer daerom met een Enghelsch schip in Castilien, by een stadt Porta sancta Naria ghenaempt ende daer wouden sy dat schip met Wijn laden. Van daer soo reysde ick na een stadt Ciuilen ghenaemt, ende daer vandt ick dry schepen dye werden toe ghe-

[fol. B8r]

rust ende wouden nae een landtschap Rio de Platta genaemt waren, het welcke gelegen is in America Dat selue landtschap ende dat goutrijcke landt Pirou genaemt, het welcke voor sommige Iaren geuonden is worden ende Brasilien, is alte samen een seer vet lant. Dat selue landt voort in te nemen, waren voor sommige Iaren schepen derwaerts geschict, van dien was een weder comen ende begeerden meer hulpen, seyden veel hoe goutrijcke dat het lant was, die hooftman vanden dry schepen was genaemt Don Diego de Senabrie die soude van wegen des Conincx een Ouerste syn in dat Lantschap, Ick begaf my in een vanden schepen, ende sy werden seer wel gerust. Wy voeren van Civilien nae sint Lucas, daer die Ciuilische riuiere inde Zee gaet, wachten op goede wint