Uvaerachtige Historie ende beschrijuinge eens Landts in America gheleghen, wiens inwoonders Wilt, Naect, seer godtloos, ende wreede Menscheneeters zijn

☞ Die eerste wtvaringe mijnder eerster Schipvaert van Lissebonen wt Portugale.
Dat II. Capittel.

VAn Lissebonen seylden wi met noch een cleyn Scheepken dat oock onsen hooftman toe behoorde, ende quamen eerstmale by een Eylant Eilga de Madera ghenaemt ende hoorde den Coninck van Poortegael toe, ende daer wonen Portugaleusers in, het is vruchtbaer van Wijn ende van Suycker, Ter

[fol. B3r]

selver plaetsen by een stadt gheheten Funtschal, namen wy meer victalien int Schip, Daer nae voeren wy van Barbarien, nae een Stadt Cape de Geel genaemt, die behoorde eenen witten moren Coninck toe Schriffri genaemt. De Stadt hadde hier voormaels die Coninck van Portugael in gehadt, ende die selue Schiffri heeftse hem wederom genomen. By die selue stadt meynden wy dat voorgenoemde Schip te crigen, die metten onchristenen oft Turcken comenschap handelden.

Wy quamen daer by ende vonden veel Castiliaensche visschers daer onder dat lant, die berichten ons hoe dat daer by der stadt Schepen waren wy voeren daer by, doen quam daer een Schip wter hauene wel gheladen, daer vooren wy na, ende creghent, maer dat volck ontvoer ons met den boot, daer sagen wy eenen ledigen Boot opt landt staen, die welcke ons wel diende tot dat genomen schip, wy voeren daer by ende haelden dien Die witte Moren quamen sterck aengereden, ende wilden dat beletten, maer sy en consten om ons geschuts wil daer niet toe comen. Wy namen den boot ende voeren met onsen buyten (twelcke was suycker, Amandelen, Dayen, boecxhuyden ende Gommi arabicum, daermede dat schip wel geladen was) wederom na Eligade Madera.

Wy schicten ons cleyn schip na Lissebonen, om dat den Coninc te laten weten, hoe wy ons met sulcken buyt souden houden, want het behoorde Valentiaensche ende Castiliaensche cooplieden toe. Ons wert vanden Coninc gheantwoort wy souden den buyt daer in dat Eylant laten, ende met onse reyse voortvaren, in middeler tijdt soude syin

[fol. B3v]

Altesa oft Mayesteyt grondelijcken ondersoecken hoe datter mede ware. Wy deden also, ende voren weder na Cape de Geel, om te besien of wy meer vets vercrijgen conden, maer ons voornemen was om niet, ende den wint liep ons tegen by den lande, die ons beletten. Den nacht voor alder Heylighen voerden wy van Barbarien met eenen

grooten stormwint, na Brasilien toe. Als wy nu CCCC. mijlen van Barbarien af gheuaren inde Zee, quamen veel Visschen om dat schip, die wy vingen met hengel haecken. Van den seluen waren sommige die de Schippers noemden Albacore, die waren groot, sommige Bonitte, die waren cleinder sommige Durado, Ooc waren daer veel visschen so groot als Haringen, die hadden ouer beyde syden vlimmen, gelijck de Vledermuysen, die seluen worden seer veruolcht vanden groten visschen, ende wanneer sy die gewaer worden, so heffen sy haer op wten water met grooten hopen

[fol. B4r]

vliegen ontrent twe vademen hooch ouer dat water, sommige so verre datmense nau sien conde, ende dan vielen sy wederom int water, wy vondense dicwils des morgens int schip liggen, ende waren des nachts metter vloge daer in geuallen, ende hieten in Portegaelsche sprake Pisse Bolodor. Daer na quamen wy inder hoochden der linien Equinoctiael ende daer was grote hitte, want de Son stont recht bouen ons alst opten middach was, daer en was met allen geen wint sommige dagen, dan inder nacht quam dicwils groten donder ende onweder met regen ende wint, verhieuen oock lichtelijc, ende vergingen oock lichtelijck, ende om dat deselue ons niet verraschen en souden als wy te seyl wa-

ren, so moesten wy neerstelic waken. Maer alst nv wederom een vaerwint begost te wayen, soo werdet storm weder, ende dat duerde sommige dagen, ende was ons contrarie, ende sorchden waert dat lange duerde, dat wi gebrec ende honger souden moeten lijden, wy riepen Godt aen, baden om goede wint

[fol. B4v]

Het ghebuerde op eenen nacht dat wy eenen groten storm hadden, ende wi waren in grooter vrese. Daer schenen ons veel blauwe lichten in da schip, de welcke ick noyt meer ghesien en hadde. Daer die baren voor in schip sloeghen, daer ginghen dye lichten oock. Die Portugaloisers seyden dat de lichten een teecken des toecomenden goets weder waren sonderlijcken van God ghesonden om inden noot te vertroosten. Wy danckten God daer voor met eenen ghemeyn Ghebet. Daer na verdwinden si weder ende dese lichten heeten Santelmo oft corpus sancta.

Als nu den dach aen quam werden ghoet weder, ende quam een goede windt dat wy merckelijck saghen dat sulcke lichten moesten een wonderlijck werck Gods sijn. Wy seylden door de zee met goeden wint. Den .xxviii. dach Ianuarij cregen wy eenen hoeck lants int ghesicht een Hauen la Cape de lanct Augustin ghenaemt Acht mijlen van daer quamen wy in een hauen Brannenbucke ghenaempt, ende wy waren .48. dagen inder zee eer wy dat lant sagen Op de selue plaetse hadden dye Portugaloisers een vasticheyt ghemaect, Marin genaemt. De hooftman vander seluer sterckte was geheeten Artokoclio ende dien leverden wy die gheuangen ouer, ende loeden sommighe ghoeden wt, dye sy daer hielden Wy beschicten onse dinghen inde hauen, ende wouden voort seylen, daer wy meynden te laden.