Hier beghint die Historie.
Dat. I. Capittel.
ICk Hans Staden van Homborch in Hessen, nam voor my (alsoo verre dat God beliefde) Indien te besien, ben met dier meyninghe van Bremen na hollant geuaren. Te Campen quam ick by schepen die wilden in Portugal sout laden daer voer ick mede derwaerts, ende wi quamen den xxix. dach Aprilis des Iaers 1547. by eender stadt ghenaempt S. Tuual, wy waren vier weken opt water te varen. Vandaer tooch ick na Te Lisbonen dwelck vijf mijlen van S. Tuual is. Te Lisbona quam ick in een herberghe daer die weert genaempt wert die Jonghe luer, ende was een Duytsch: daer lach ick een wijle tijdts thuys. Desen seluen werdt seide ic hoe dat ick wt mijns vaders landt ghetoghen was (waert dat my ghebueren, mochte) om in Indien teseylen doen Antwoorde hy, Ick was te langhe wt ghebleuen, want des Conincx schepen die in Indien varen waren langhe wech ick badt hem derwijlen dat ic dye reyse versuympt hadde, dat hy mi aen eenen anderen helpen soude, midts dat hy dye sprake conde ick soude hem wederom in sijnen dienst sijn. Hy bracht my in een schip voor busschieter die Capitain vanden schepe was ghenaemt Pintiado, ende hy woude in Brasilien varen om comenschap, hy hadde oock oorlof dye schepen te crijgen dye in Barbarien metten Mooren comenschapten Oock waer dat hy de Francoysschen schepen in Bresilien metten wilden lieden comenschappende vont, die souden prijs sijn.
Auteursrechtvrij