Uvaerachtige Historie ende beschrijuinge eens Landts in America gheleghen, wiens inwoonders Wilt, Naect, seer godtloos, ende wreede Menscheneeters zijn

[fol. A2v]

Den doorluchtighen ende hooch ghebooren Vorsten ende Heeren Heer Philipe Lantgraef tot Hessen. etc. mijnen ghenadighen Heere.

GHenade ende vrede in Christo Ihesu onsen verlosser, Ghenadige vorst ende Here. Die Coninicklijcke Propheet Dauid spreeckt in den hondersten ende seuensten Psalm: Die met schepen opte zee varen, ende drijuen haren handel in groote wateren, die des Heeren werck versocht hebben, ende sijne wonder tot inder See, wanneer hy sprack eenen storm windt quam op, dye de baren op hief, ende inden hemel ouerde ende wederom inden gront, overde, soo dat haer siele van vreese versaefde ende datse tuymelde ghelijck een droncken menschen, ende en wisten geenen raet meer. Ende als sy dan totten Heere schreyden in haren noodt ende hijse wt haren ancxt ende sorghen ouerde, ende stilde dat onweer, dat die baren hen seluen neder leide ende datse vrolijck ende blijde werden, om dat stille gheworden was, ende datse so te landen ghebracht waren naer haren wenschen, die souden den Heere dancken, om zijn goetheit ende om zijn wonderdaet die hi aen den menschen kinderen doet ende hem by der gemeynten prijsen, ende byden ouders hem beloeuen.

Also bedancke ick my teghen den almachtigen Schepper des Hemels, eerden ende der zee sinen soon Ihesum Christum, ende den heyligen Gheest vande groote ghenade ende bermherticheyt die my geschiet is onder den wilden lieden des lants Bresilien welck inwonders, my geuangen hadden, ge-

[fol. A3r]

naemt dye Tuppin Imba, menschen-vleesch-eters diens gheuanghen neghen maendt ick gheweest ben ende veel andere vervarentheden, die my door die heylighe dryuuldicheydt door een ghansche onuerhoept wonderlijcke maniere ende wijse geschiede ende veruaren zijn, dat ick nae langhe ellende, armoede, ende, vreese van lijf ende leuen te verliesen, wederom in V.W.G. vorstendomme mijn hoochste ende lieste vader landt wederom na dat verloop van zommige iaren gecomen ben, ende heb W.V.G. sullen mijne reyse ende schipuaert onderdanichlijcken aenteekenen willen, dwelck ic opt corste begrepen heb op W.V.G. tot uwen wel geualle, ende gheleghentheyt, daer inne metter hulpen Gods hoe ick door dat lant ende zee getogen ben v dat voorlesen laten wille om der wonderlijcke geschiedenisse wille, die de almachtige God inden noot by mi ghedaen ende ghetoont heeft, daer met oock V.W.G. aen my niet en twijfele, als oft ick onwarachtighe dingen te verstaen geven die waer wilde V.W.G. ic soude een pasport totter seluer saecken dienende, selfs thoonen ende laten sien, twelc ic presenteer. Godt si alleen die eere, ende beveel mi hier met V.W.G. in alle onderdanicheyt Gescreuen te Wolffhagen den xxii. dach Iunij, Anno Domini vijfthienhondert ende lvi etc. V.W.G.

Gheboren ondersaet Hans Staden van Homborch in Hessen, borgher te Wolffhaghen.