Uvaerachtige Historie ende beschrijuinge eens Landts in America gheleghen, wiens inwoonders Wilt, Naect, seer godtloos, ende wreede Menscheneeters zijn

[fol. A1v]

¶ Die Boeckdrucker totten Leser.

AEngesien dat vele warachtige historie van diuersche landen, ende het leuen ende handel vanden inwonders niet alleen seer cortwijlich ende genoechghelijck, maer ooc seer profijtelijc is (want wy daer door vermaent worden Godt te louen ende te dancken, dat hy ons ende onse landen, buyten alle Heydensche ende goddeloose door zijn heilich woordt begaeft heeft met goede leeringe eerlijcke policie, ende duechdelijcke manieren) So heb ick tot uwen dienste ende profijt goetwillighe leeser door den druck int openbaer ghebracht een warachtighe beschriuinghe des Landts America ghenaemt, wiens inwoonders Wilt, Naect ongoddelijck, ende in alle manieren meer beestelijc dan menschelijc zijn want si niet alleen beesten tot des menschen behoef gheschapen en eten, maer ooc menschen vleesch met groter onhebbelijcheyt verslinden dwelck ons niet alleen van Hans Staden deses boecx beschrijuer verclaert en is, maer oock van eenen genaempt Andreas Teuet veel breeder ende opentlijcker beschreuen wordt welcke ick onlanx door den druc oock sal in voorschijn laeten comen.

Daer ick int langhe breeder verhalen sal alle die gheleghentheydt vanden Lande, ende die ghesteltenisse vanden Lieden, Van haer luyen leeuen, Çeremonien ende hare Wetten, die

[fol. A2r]

si houden onder haer ghelijc ic dat eensdeels met mijnen ooghen gesien heb als ick daer int landt was, ick hadde voor my ghenomen als ick dit boeck schreef dat ick veel dinghen die in dit Boec staen int langhe soude verhaelt hebben maer ick hebt ghelaten om dat ick voor my ghenomen heb dit boeck hier voor verhaelt, oock in druc te laten wtgaen also verre mi Godt spare in ghesontheyt ende dat ick sie dat v mijn schrijuen aengenaem is ende om dattet periculeus is te reysen oft verkeeren in dese landen daerom heb ick dit boec in corte beschreuen om dat die gene die daer sy hebben te reysen haer seluen souden wachten voor sommighe ongeluc dat haer soude moghen toe comen want alsmen te vooren gewaerschout is so heeft hem een yegelijc goet te wachten voor die periculen die hem toe souden mogen comen want periculen sonder twijfel daer int lant groot perickel geleghen is int reysen gelijc ghy hier in dit boeck bevinden sult int lesen. Aldus dan ist sake dat dese mijnen arbeyt in dancke van v Leser genomen wordt so sal ic neersticheyt doen om meer historien der lantschappen tot gtmeyn profijte int openbaer te brengen, dwelc ghy cortelijck sult mercken ende beuinden aen die wonderlijcke historie van de Septentrionale landen welcke ick v onlancx sal laten ghenieten op dat ghy dese ende meer ander te samen brengende moget sien wat manieren wat relige, ende oefeninge elck lant besonder houdende is. Tot Antwerper, Den .8 May Anno 1558.