Boeck van surgien

Capm. .v. vanden medecinen incarnative aggregative dat is vergaderen ende conglutinative.

Nu hebdi ghehoert vanden medecinen die vleesch doen wassen in diepe wonden ende in ulceren ende in fistelen die ghemortificeert siin. Nu wil ic u voert scriven vanden medecinen incarnative ende aggegative ende conglutinative dat is alleens. Ende haer natuer is dat se verdroghen doen met eenre clebberachticheit die de lippen vanden wonden doet vergaderen daert vleysch niet altemael af en es metten stucke. Ende dit siin die medecinen incarnative aggregative carnis die gheproeft siin met redene ende met ghetuijghenisse der vroeder ouder meesteren die se gheproeft hadden. Ende dat is scorsen van palmboomen die die dattelen draghen. Die blader vander weghebreeden ende coelblader. Ende die blader vanden bomen garnaten. Ende die blader van siperessen ende terbentiin ende versche groen okernoten ghestoten ende met sout ghesoden in water of in wiin [Ende die blader vanden ockernoten]. Ende dat meel dat ghestoven

[p. 250]

is an die want vander molen ende ghebrande garste die bloemen van sorben ende soete melc doet grote wonden vergaderen ende conglutineren. Ende blader van witter lelien. Dit siin die simple medecinen die groot wonder werken ende olij rosarum ende olij mirtinum siin oec herde goet daertoe. Dit sijn die composite medecinen die de lippen vanden wonden doen vergaderen ende oec consolideren: R. scavelinghe van witten ouden lijnen doecken ende neemt olij rosarum. Ende smelt daerin een luttel galbunum ende incoperreret metten scavelinghen van den ouden linen doeken ende maect daeraf salve ende doet daertoe ghebranden aristologie ende van wieroc alsoe waert veel te beter. Ende het soude te sterker wercken. Ende albucasim seit dat een deel wieroc ende .½. deel sanguis draconis ende .ii. deel ongheblust calc doen wonderlike seer ende wael conglutineren. Ende bi seit oec gheb[r]eket u sanguis draconis ende olybanum ende den calc doen alleen den orbaer.