Boeck van surgien

Hier begint die vierde tractaet van onsen boeke ende is dat leste ende die anthidodaris van surgien.

Lieve kinder ontfanc dese anthydotariis die u int ende van desen boeke te menigher stat heeft gheloeft: Ende sullen siin medecinen die ic menichwerven hebbe gheproeft ende hebbe gheset in .viii. capittelen. Ende eerstwerven van der medecinen repercussiif. [Ende dairna vanden medicine resollitive ende maturativen]. Ende daerna vander medecinen mondificatiif. Ende daerna vander medicinen conglutinative ende regenerative ende consolidative. Ende daerna te mollificeren alle herde gheswellen. Ende daerna int leste vanden medecinen die corroderen ende cauteriseren. Nu leer ic u dat als ghi wilt leggen medecinen repercussiif soe dunct mi goet dat ghi eerstwerven purgeert die materie. Die heete materie met laten of met ventosen of sonder ventosen met hicken metter vliemen. Ende dese medecinen die herde goet siin ende seker. Ghi sult nemen .viij. prumen damasticum ende .j. o. violetten. Dit suldi sieden in een pont waters toter helft. Ende in

[p. 240]

[een ander] .½. pont waters suldi sieden thamari[n]den ende manne. Ende dat ma[r]ch van cassiafistelen .ii. vallen van elken .<fr>1/2</fr>. o. ende dit suldi metten handen sterkeliic uutpersen ende daerna suldiit menghen ende sulter toedoen scorsen van mirabolanen citrini ghepulverseert .<fr>1/2</fr>. o. ende aldus suldiit laten staen alle den nacht. Ende des merghens vroech in den dagheraet suldiit weder sieden ende werment ende ghevent hem drincken. Of ghi sult hem gheven desen pillen: R. mirabolanen citrini rode rosen elx .j. o. aloes cicatrini .ii. dr. scamoneie .<fr>1/2</fr>. dr. hieraf suldi maken pillulen ende gheefter hem drie. Ende als die materie ghepurgeert is soe suldi u helpen met desen simpelen medecinen of conpositen.