Boeck van surgien

Capm. vander doofheit van den oren.

Nu hebdi ghehoert vander sweer vander tonghen ende den occuzoene ende die cuere. Nu wil ic u voirt scriven vander doofheit. Ende segghe dat die doofheit mach siin in drie manieren. Alsoe als Avicenna seit. Dat horen mach worden ghemiindert of het mach worden verandert of het mach altemael worden verloren. Dit seit Avicenna. Nu suldi weten dat dit mach comen van heeten of van couden. Ende comet van overtoligher hitten seldier in dropen tsap van prumen gernaten ghemenct met olie rosarum of tsap van nasscaden of van lachteken ghemenct met een luttel wierocs ende wiinedic dat ghenoech is aldaer wonde in is. Mer om des wille dat die doofheit dicker coemt van coude dan van hitten soe wil ic daer ieghen scriven meesterliic die cure dan dat van hitten coemt. Comet van couder materien tqualiic horen soe seldi die coude materie doen digereren ende alst ghedigereert is dan suldi cureren ende aldus thooft purgeren. Ende dan suldi van binnen beginnen te werken. Ende dit seit constantinus dan suldi doen sieden heete cruijden in water ende roken [doen] daer over. Ende die cruden sullen siin als levender satureya salvia bethonica absinsium ende dies gheliic. Ende men salse oec salven ende daerin druijpen met finen balseme

[p. 182]

opdat hi riic is ende ment vercrighen mach of met olien costino of met olien van bitteren amandelen of ghi sult indropen galle van enen verre of van sinen orine ghemenct met mirre of ghi sult hem maken dit collirium. Ghi sult nemen tsap van beiden sentauren en tsap van poerloeke ende van aiuijne ende sterken wiinedic van elc even vele hier salmen in doen sieden eyere van mieren ende pieringhe ghemenct met bloede van alen ende hieraf sal men in die oren dropen al lau. Ende wat dat men in die oren drupet dat sal lau siin ende niet [te] cout noch [te] heet. Item in olie muscilinum is oec herde goet. Ende elke galle van voghelen die van proyen leven in dore ghedropen is herde goet: Item neemt een aiuijn ende hoelten binnen ende doet daerin tsap van aiuijne ende van poerloeke ende van alsene met olie muscilinum ende met vrouwensponne ende dan suldi die scorsen afdoen alom vanden aiuijne ende dat ander suldi wringhen doer eene sterken doeck ende daeraf suldi drupen enen dropel int ore. Ende dan suldi die ore toestoppen met catoen. Ende achtwerven suldiit daerin doen telken die ore suver ende rein maken binnen. Ende dan suldi weder over een wile daerin drupen ende aldus suldi doen dicwiille want ic weet wel dat dit herde orbaerliic is ende goet. Ghi sult nochtan hoeden als een mensche beheert van een heet onghemac of van anderen groten onghemaken dat ghi hem niet en sult drupen in die oren omdat die natuer mocht worden belet al worde hi oec al doef. Ende al hadde hi oec grote sweer in die oren want als die overtollighe humoren uut den lichaem ghepurgeert siin die oresweer sal altemael te niet gaen.