Boeck van surgien

Capm. vanden tantvleesche [dat verrot is of vervult of versworen] de cure.

Dit tantvleesch wordt somtiit verrot ende gheulcereert of tghehemelte ende dan salment wasschen met starken wiinedic ofte met ghesouten water ende daermede salment wriven [sterkelike] soe dat bloet ende die verrotte verscheit uut come ende daerna droghet [ende] stroijter dit pulver op: R. consolida maior groffels naglen rosen caneel scorsen van prumen garnaten ana. Dicwil verandert die verrotheit int tantvleesch ende int tghehemelte ende wart cancer of fistel ende dan salment wasschen met wiinedic ende met ghesouten water ende wriven alsoe ic u voerseide ende daerna sal men daerop stroijen dit pulver: R caneel groffels nagle noten miscaten rosen aluijn zuccarini pieritrum die hoofden ende die beenen vanden creeften die steenen vanden dattelen ghebernt ende die scorsen van prumen garnaten

[p. 170]

van elken even vele. Ende en besciet dit al niet soe salment cautriseren toten gronde. Ende en gheneset niet metten cautriseren dan moet ment ontdecken ende dat been dat ghecorrumpeert is uut doen ende voertaen cureren totdat ghenesen sij. Ende wast daeruut overtollich vleesch dat sal men met eenen haexken af lichten ende al af sniden toten gronde ende latent wael bloeden. Ende daerna opstroien pulver desiccatiif. Mer om dies wille dat aldus danich overtollich vleesch pleghet gheerne weder te wassen soe eest beter dat men cautriseer dat al[st] afghesneden is.