Capm. van allen onghemaken die comen moghen in die lippen.
In die lippen in den mont ende in de kele comen menigherhande onghemaken. Ende ic wilse u hier al sonderlinghe noemen. Ende ic wil van elken sonderlinghe scriven die cuere volcomeliic. Ende ic segge dat van heeten ende van sterken humoren worden die lippen gheulcereert ende ghecloven. Ende dit siin die medecinen die daertoe goet siin ende openbaerliic: R. gumme dragagantij amidi pennidi ana pulverseert ende tempert met rosewater ende daermede suldise salven of met olie rosarum. Ende die medecinen die goet siin ten ghecloven lippen [dat is dat] Ghi sult nemen die keerne van okernoten ende bernense ende die wortel van porceleine van beiden even veel ende conficeert met seeme ende met olien dat uter ghebernder keernen vander okernoten coemt is oec utermaten goet ende spilium met ghesoden wine ende laten ventosen setten onder die kinne dat es goet ieghen ulceren vanden lippen ende ieghen ghecloven lippen. Ende als alle dese medecine niet en besciet[en] dan suldise cautriseren met gloyden iseren ende toten gronde ende dan cureert alsoe ghi cont.
Auteursrecht onbekend