Boeck van surgien

Capm. vanden stanc vander nasen [die curen der of].

Die stanc die vander nasen coemt als Galienus seit die coemt van ghecorrumpeerder humoren die uut den hoofde comen int knoeselvleesch vander nase daert in vertaijt ende verliimt dan worden die humoren verrot met eenrehande hitte daeraf coemt eenrehande ghecorrumpeerde lucht ende stinct ende die sal men aldus cureren. Men sal purgeren thooft met iralogodian of met pillulen daeraf ghemaect. Men sal oec thooft salven met wermer olien. Ghi sult oec nemen calami aromatici anteras dat is dat saet van rosen

[p. 168]

gariofilorum ana I. dr. galle mirre ana. ½. dr. musci. <fr>1/2</fr>. dr. Al dit sal men pulverseren ende in die nase doen. Item tsap van eerculle dit daerin ghedaen is herde goet. Item neemt spika nardi gallie muscate gario fiolarum ana .ii. dr. dit sal men sieden in drie pinten goets wits wiins ende wel rukende ende dit sal hi gargarificeren ende wieken daerin netten ende steken die in die nase: Item neemt tsap van swarter menten ende van ruten ende gietent hem in die nase. Item doet hem drincken sentaura met wiin ghemenct ende die wortel van varen in water ghesoden ende tien daghe alle daghe daerin ghedaen dat es herde goet.