Boeck van surgien

Capm. vander nasen cuere.

Nu hebdi ghehoert die curen vanden onghemake van den oghen nu wil u sriven die onghemaken vander nasen ende eerstwerven van eenen onghemake heet polipus ende is overtollich vleesch dat hem tonet van binnen der nasen. Ende die occusuene daeraf is een grove humore viscoijs die coemt ghemorificeert vanden hoofde dalen ter nasen [so] dattet vleysch wert. Ende dat mach men bekennen dat die nase ghesopt es soe datter gheen adem uutlosen en mach. Ende die roke is quaet die daeruut coemt ende stinct ende men siet daerin vleesch. Ende oec coemter uten nasegaten somtiit een dinc gescoten al oft waer een blase. Ende somtiit meerdert die nase van desen onghemake ende wort al waterachtich. Ende dese sieken ghevoelt niet goets ende die nase wort al hart. Ende dat quade vleesch dat in die nase is en comt niet uutwaert ende dan en suldier niet toe doen want het es een maer van cancer. Ende waer dat sake die nase ghesont scene van buyten ende moru ende dat mense wel mochte handelen ende dat hi niet en waer swartachtich dan cureerten coenliic sonder vreese dan suldi die nase opluijken ende sult dat vleesch nemen met eenen haec ende treckent uutwaert ende snident alte mael of ende waert dat giit niet altemael of en const ghesniden ende datter aenbliift suldi altemael af scaven met enen subtilen instrument

[p. 167]

soe dat wel ghesuvert si. Ende daerna suldiit cautriseren ende die wortel uutbernen met eenen gloijden iser of legter op sterke corosive dat [al] af ete ende daerna legter op boter tot dat die corste afvalle ende dan suldiit cureren tot dat ghenesen si: Ic heb oec dicke polipus ghenesen met sterken corosiven sonder sniden. Het ghevalt oec somtiit dat dat vleesch was doer dat opperste been dat doergaet is daer gheen instrument toe comen en mach noch en can. Ende dat suldi bekennen als ghi hem averrecht doet liggen op sinen rugge ende als ghi hem giet in siin nasegaten edic of wiin of water en gheen verscheit daer af en come in die kele. Ende dit is daeraf die cure. Ghi sult nemen enen draet die een luttel grof sal siin ende sulter aen knoepen veel knoepen ende den eenen knoep vanden anderen een vingherbreet. Ende sal die sieke steken dat een einde van onder opwaert met eenre tasten of met eenen subtilen iser of met enighen anderen subtilen dinghen tot dat hi come tot den oppersten gate ende dan trect den adem vander nasen opwaert totdat dat einde come in den mont ende dan suldi nemen beide die enden vanden drade ende trecken harwaerts ende darwaert al[s] men trect een saghe daer men hout mede saecht soe dattet vleesch afga metten knoepen. Daerna suldi den draet uuttrecken ende sult een wieke daerin steken die sal siin ghenet in sterke medecine dessiccatiif ende steect inden nase een looden pijpe todat ghenesen sij. Quame oec in die nase enich ander onghemac als oft waer een wratte of diesghelike soe suldi se cureren alsoe men polipus doet.