Capm. ix. van herpos estiomnes dats die wolf.
Herpos estiomnes es een herde quade aposteeme ende es te segghen dat hem selven eet. Noch anders est gheheeten lupus dat is een wolf. Ende lupus coemt van herisipila die te voren gheweest heeft ende niet en heeft gheweest ghetempert ende daerom eest thelsche vuer of sinte anthoniis vuer ende coemt van heeter bernender coleren ende ghecorrumpeerder die ghetoghen es toten leden daert corrodeert ende eet ende breit hem starkeliic al corroderende. Ende int beginsel voelt die sieke grote steecten met bernender hitten. Ende als lupus verandert [so is hi blaeu] es soe bekennet men dat [tlet] hart is ende swart ende diep ghecorrodeert es. Ende dan moet men haesten tangherliic te cautriseren met gloijden jseren of men legghe daerop sterke medecinen die mortificeren als arsenicum sublimatum of realgar ghereperreert. Ende ghi sult weten dat men realgar aldus sal reperreren men sal nemen .ii. jseren platen of coperen ende salse gloijende heet maken ende sal dien realgar daer tussen legghen ende latent droeghen. Ende aldus sal men doen .iii. of vierwerven daermede salt blesschen ende verliesen siin veniintheit ende sal goet siin mede te mortificeren lupus cancer ende fiste\len
Auteursrecht onbekend