Hemelsch nachtegaelken oft gheestelijcke liedekens, om deught met vreught te beoeffenen
(1644)–Joannes de Lixbona–
Auteursrechtvrij
[pagina 44]
| |
Liedeken waarin de ziele IESVM haeren Al noemt, die haer gansch voldoet ende versaedt; Op de wijse: Al hebben de Princen haren vvensch &c. (oft) iesvs mijn lief en niemandt el &c.
| |
[pagina 45]
| |
1.
IEsu, mijn Al, en mijnen Een,
Die ick bemin, en anders gheen:
Daer ick op stel mijn hert en sin:
Om dat ick 't in u alle vin.
2.
Soete springh-ader vande vreught,
Die my alleen innich verheught:
Die sonder sangh oft snaer-ghetier
Mijn ziele stelt in vol playsier.
3.
Ben ick in sieckte of in pijn;
Iesus is troost en medecijn:
Hy maeckt een suyver minne-wont;
Waer door mijn ziele wordt ghesont.
| |
[pagina 46]
| |
4.
Praemt my den dorst, of hongers noot;
Iesus is dranck en Hemels broot:
Een broot, dat niet en wordt verteert;
Maer dat den mensch in Godt verkeert.
5.
Wat isser, daer mijn ziel af claeght,
Als sy maer Iesum by haer draeght?
Den besten pant, den rijckxsten schadt,
Die oyt een Prins den werelts hadt.
6.
Gheen gelt, gheen gout, gheen Coninck-rijck
Can by mijn Liefste sijn ghelijck:
Gheen dranck, gheen spijs, gheen soeticheyt
By Iesus teghenwoordicheyt.
| |
[pagina 47]
| |
7.
Iesu, of ick in u soo stondt,
Dat ick hier noyt gheen vreught en vondt;
Maer bleef en leefde ten aller tijt
In u, die 't levens leven zijt!
8.
Ick wensche, dat al mijn verstant
In u mach wesen vast gheplant:
Soo dat ick niet en ken noch leer,
Als Iesum, daer ick meede verkeer.
9.
Ick wil mijn wille gans gaen uyt,
Dat ghy die in u wille sluyt:
Dat ghy mijn lust en sinnen stilt,
En breeckt den wil, die anders wilt.
| |
[pagina 48]
| |
10.
Als ick dan Iesu soo aen-cleef,
Heb ick een leven, daer ick leef;
Een waerheydt, daer ick vast in staen;
Een wegh, waer door ick recht mach gaen.
FINIS |
|